Թուրքիայում ինքնաթիռը կանգնեցրել և տարհանել են ուղևորի սարքի պատճառով

Թուրքիայի Անկարայի օդանավակայանում Pegasus Airlines ավիաընկերության ինքնաթիռը կանգնեցվել է թռիչքուղու վրա և իրականացվել է ուղևորների տարհանում՝ ուղևորներից մեկի power bank-ի հետ կապված միջադեպի պատճառով։ Այդ մասին հայտնում է Turkiye Today-ը։

Դեպքը տեղի է ունեցել հունիսի 5-ին։ Ինքնաթիռը պատրաստվում էր իրականացնել կանոնավոր չվերթ Անկարայից դեպի Իզմիր։ Թռիչքուղի դուրս գալու ընթացքում սրահում գտնվող ուղևորներից մեկի արտաքին մարտկոցը սկսել է ծխել, ինչից հետո անձնակազմը որոշել է անհապաղ տարհանել բոլոր ուղևորներին։

Տարածված կադրերում երևում է, թե ինչպես են մարդիկ սպասում ինքնաթիռի դռների բացմանը ծխով լցված սրահում, իսկ ավելի ուշ՝ լքում օդանավը փչովի սահուղիներով։ Նախնական տվյալներով՝ տուժածներ չեն եղել։ Ավելի վաղ ևս գրանցվել էր նմանատիպ դեպք, երբ power bank-ը վնասել էր ինքնաթիռի նստատեղը թռիչքից կարճ ժամանակ անց։