Վառելիքի թանկացման ֆոնին եվրոպացի վարորդները նվազեցրել են սպառումը

2026 թվականի ապրիլին Եվրամիության երկրներում վարորդները սկսել են ավելի քիչ վառելիք օգտագործել՝ գների աճի ֆոնին։ Այդ մասին հայտնում է Financial Times-ը՝ հղում անելով Եվրամիության վիճակագրական ծառայության՝ Eurostat-ի տվյալներին։

Ըստ հաշվարկների՝ վառելիքի սպառումը տարեկան կտրվածքով նվազել է 3,5 տոկոսով։ Սա առաջին նման անկումն է 2024 թվականի հուլիսից ի վեր և ամենախոշորը՝ 2023 թվականի հոկտեմբերից հետո։ Եվրոպական մի շարք երկրներում՝ այդ թվում Գերմանիայում, Նորվեգիայում և Ավստրիայում, սպառման նվազումը հասել է երկնիշ ցուցանիշների։

Միաժամանակ դիզելային վառելիքի գները Եվրամիության 12 երկրներում տարեկան աճել են միջինը 33,7 տոկոսով, իսկ բենզինի արժեքը՝ 13,6 տոկոսով։ Լրատվամիջոցի գնահատմամբ՝ Մերձավոր Արևելքում լարվածության և էներգակիրների մատակարարման խափանումների հետևանքներն առավել ուժեղ են զգացվել հատկապես Ասիայի երկրներում, որտեղ արձանագրվել է վառելիքի գների կտրուկ աճ։