Հունգարիայում Օրբանի շրջապատին մեղադրել են ԵՄ միլիարդավոր եվրոների միջոցների յուրացման մեջ

Հունգարիայի հակակոռուպցիոն մարմինը հայտարարել է, որ անհրաժեշտ է պատասխանատվության ենթարկել նախկին վարչապետ Վիկտոր Օրբանի մերձավոր շրջապատի բարձրաստիճան պաշտոնյաներին՝ Եվրամիության հիմնադրամների միջոցների հնարավոր յուրացման գործով։ Այդ մասին հայտնում է Politico-ն՝ հղում անելով վերահսկող մարմնի տվյալներին։

Հունգարիայի բարեվարքության հարցերով վարչության ղեկավար Ֆերենց Պալ Բիրոյի խոսքով՝ նախորդ իշխանությունների օրոք ձևավորվել էր համակարգ, որի միջոցով, ըստ նրա, տարիներ շարունակ վնաս է հասցվել եվրոպացի հարկատուներին։ Ստուգումների արդյունքում պարզվել է, որ պետական գնումների զգալի մասը կենտրոնացվել է երեք ընկերությունների ձեռքում, իսկ պայմանագրերի արժեքները, ենթադրաբար, արհեստականորեն բարձրացվել են։

Ըստ հրապարակված տվյալների՝ Օրբանի կառավարման վերջին չորս տարիներին այդ ընկերություններին ուղղվել է մոտ 10 միլիարդ եվրոյի պետական միջոց, որից շուրջ 3,5 միլիարդ եվրոն կարող է կապված լինել հնարավոր կոռուպցիոն սխեմաների հետ։ Հակակոռուպցիոն մարմնի ղեկավարը նաև հայտնել է, որ հետաքննությունների ընթացքում իր ընտանիքի նկատմամբ եղել են ճնշման և կաշառքի փորձեր։ Նոր վարչապետ Պետեր Մադյարը հայտարարել է, որ կոռուպցիայի դեմ պայքարը և հնարավոր յուրացված միջոցների վերադարձը լինելու են իր կառավարության առաջնահերթություններից։