Բժիշկը նշել է գլխուղեղի ուռուցքի հնարավոր առաջին ախտանշանները

Գլխուղեղի ուռուցքի վաղ փուլերում կարող են ի հայտ գալ ոչ միայն գլխացավեր, այլ նաև վարքագծային և հորմոնալ փոփոխություններ։ Այդ մասին «Լենտա․ռու»-ին տված հարցազրույցում հայտարարել է «ԼաբՔվեստ» լաբորատորիայի պաթոմորֆոլոգիայի և կլինիկական ցիտոլոգիայի բաժնի ղեկավար, բժշկական գիտությունների թեկնածու Դմիտրի Բուլանովը։

Մասնագետի խոսքով՝ ուշադրության արժանի կարող են լինել նոր տեսակի անսովոր գլխացավերը, հիշողության խանգարումները, կարճատև «անջատումները», խոսքի, տեսողության կամ շարժումների կոորդինացիայի խնդիրները, ինչպես նաև վարքի փոփոխությունները։ Բժիշկը նշել է, որ երբեմն հարազատները պարզապես նկատում են, որ մարդը «այլևս ինքն իրեն նման չէ»՝ դառնալով ավելի դյուրագրգիռ, անտարբեր կամ դժվար կենտրոնացող։

Բուլանովը նաև ընդգծել է, որ որոշ դեպքերում գլխուղեղի գոյացությունները կարող են արտահայտվել ոչ թե նյարդաբանական, այլ հորմոնալ խանգարումներով՝ հատկապես հիպոֆիզի շրջանում։ Դրանք կարող են ներառել մշտական հոգնածություն, տեսողության վատացում, քաշի փոփոխություններ կամ հորմոնալ անհավասարակշռություն։ Միևնույն ժամանակ բժիշկը շեշտել է, որ նման ախտանիշների առկայությունը դեռ չի նշանակում ուռուցք, սակայն եթե դրանք պահպանվում են, ուժեղանում կամ կրկնվում են, անհրաժեշտ է դիմել բժշկի և անցնել մասնագիտական գնահատում։