NASA-ն ցանկանում է բարձրացնել Hubble տիեզերական աստղադիտակի ուղեծիրը

ԱՄՆ տիեզերական գործակալությունը՝ NASA-ն, դիտարկում է Hubble տիեզերական աստղադիտակը ավելի բարձր ուղեծիր տեղափոխելու տարբերակը՝ դրա աշխատանքը երկարաձգելու նպատակով։ Այդ մասին հայտնում է SpaceNews-ը։

NASA-ի գնահատմամբ՝ եթե Hubble-ի ուղեծիրը չբարձրացվի, ապա արդեն 2033 թվականին աստղադիտակը կարող է սկսել աստիճանաբար մտնել Երկրի մթնոլորտ։ Այս նպատակով առաջարկվում է օգտագործել Link անունով տիեզերական սարքը, որը մշակվել է Katalyst ընկերության կողմից և նախատեսված է արբանյակների սպասարկման ու ուղեծրի փոփոխման համար։ Սակայն նախագծի իրականացման ճանապարհին կարող է խոչընդոտ դառնալ ֆինանսավորման պակասը։

Մինչ Hubble-ի առաքելությունը, Link սարքը նախատեսվում է փորձարկել Swift տիեզերական աստղադիտակի վրա, որի ուղեծիրը նույնպես աստիճանաբար նվազում է։ NASA-ն ընդունում է, որ նման առաքելությունը բարձր ռիսկային է, քանի որ Swift-ը, ի տարբերություն Hubble-ի, ի սկզբանե նախատեսված չի եղել ուղեծրում սպասարկման համար։