Սիրիացի ապստամբները կրակել են իրանական ավիաուղիների օդանավի ուղղությամբ (տեսանյութ)

Սիրիացի ապստամբները, ովքեր վերահսկում են Դամասկոսի միջազգային օդանավակայանի շրջակայքում գտնվող մի շարք բնակավայրեր, կրակահերթ են բաց թողել իրանական առևտրական օդանավի ուղղությամբ: Տեսահոլովակը, որն ապստամբները տեղադրել են YouTube կայքում հունվարի 31-ին, պատկերում է, թե ինչպես են ապստամբները կրակում Դամասկոսում վայրէջք կատարող Boeing 747-ի ուղղությամբ:

Իրանում նման ինքնաթիռներ ունի միայն Iran Air ավիաընկերությունը. գրում է Lenta.ru-ն:

Տեսահոլովակից դատելով՝ օդանավը լուրջ վնասներ չի կրել և շարունակել է իր վայրէջքը: Ինչ ուղևորներ են եղել օդանավում կամ ինչ բեռ էր այն տեղափոխում, հայտնի չէ:

Վերջին մի քանի շաբաթվա ընթացքում Դամասկոսի օդանավակայանը գրեթե չի աշխատում: Ավիաընկերությունների մեծ մասը հրաժարվել է Սիրիա կատարվող չվերթներից երկրում ընթացող քաղաքացիական պատերազմի պատճառով:

Դամասկոսի օդանավակայանի օնլայն ցուցատախտակի վրա հայտարարված է, որ փետրվարի 1-ից ոչ մի ինքնաթիռ օդանավակայան չի ժամանում և ոչ մեկն էլ այնտեղից չի մեկնում: