Հյուսիսային Իռլանդիայի առաջնորդը անկարգությունները որակել է որպես ավազակություն

Հյուսիսային Իռլանդիայի մայրաքաղաք Բելֆաստում տեղի ունեցած անկարգությունները «բացահայտ ավազակություն» են, և դրա մասնակիցները ցուցաբերում են «զզվելի վախկոտություն», ըստ Հյուսիսային Իռլանդիայի առաջին նախարար Միշել Օ'Նիլի։

«Դիմակավորված տղամարդկանց ավազակախմբերի կողմից ընտանիքների տները հրկիզելը ոչ այլ ինչ է, քան զզվելի վախկոտություն։ Սա բացահայտ ավազակություն է», - գրել է նա X-ում։ Օ'Նիլը հավելել է, որ հունիսի 8-ին սկսված և մինչ օրս շարունակվող հակամիգրանտային բողոքի ցույցերը ներկայացնում են «վտանգավոր փորձեր»՝ շահագործելու իրավիճակը՝ «հարձակվելու անմեղ մարդկանց վրա, ովքեր պարզապես փորձում են ապրել, աշխատել և աջակցել իրենց ընտանիքներին»։ Նա ընդգծել է, որ նման հարձակումների համար «ոչ մի արդարացում չկա» և կոչ է արել դադարեցնել բռնությունը։

Ավելի վաղ Belfast Telegraph-ը հայտնել էր, որ Բելֆաստում ցուցարարները հակամիգրանտային բողոքի ցույցերի ժամանակ այրել են ավտոբուս, բազմաթիվ մեքենաներ, այդ թվում՝ ոստիկանական մեքենաներ, և մի քանի տներ։ Հրատարակության համաձայն՝ արևելյան Բելֆաստի բնակիչները տարհանվել են հրդեհի պատճառով։

BBC-ն հավելում է, որ քաղաքի նույն հատվածում մոտ 100 տղամարդ՝ բալակլավաներով, երթով անցել են փողոցներով՝ թակելով դռները և կոտրելով պատուհանները: Նրանք իրենց գործողությունները բացատրել են նրանով, որ «հետապնդում են օտարերկրացիներին»: