Տոկաևը հույս ունի տարեվերջին հանդիպել Թրամփի հետ

Ղազախստանի նախագահ Կասիմ-Ժոմարտ Տոկաևը հայտարարել է, որ ակնկալում է հանդիպել իր ամերիկացի գործընկեր Դոնալդ Թրամփի հետ այս տարվա վերջին։ Այս մասին հայտնել է Ղազախստանի ղեկավարի մամուլի ծառայությունը՝ Տոկաևի և Հարավային և Կենտրոնական Ասիայի հարցերով ԱՄՆ նախագահի հատուկ դեսպանորդ Սերջիո Գորի հանդիպումից հետո։

«Ղազախստանը վճռականորեն հանձնառու է Ամերիկայի Միացյալ Նահանգների հետ իր ընդլայնված ռազմավարական գործընկերության հետագա խորացմանը։ Օգտվելով առիթից՝ խնդրում եմ Ձեզ փոխանցել իմ լավագույն մաղթանքներն ու անկեղծ հարգանքը ԱՄՆ նախագահ Դոնալդ Թրամփին։ Անհամբեր սպասում եմ նրա հետ հանդիպմանը այս տարվա վերջին և ցանկանում եմ երախտագիտություն հայտնել Մայամիում կայանալիք G20 գագաթնաժողովին մասնակցելու հրավերի համար», - հանդիպման ժամանակ ասել է Տոկաևը։

Կողմերը քննարկել են համատեղ առևտրային, տնտեսական և ներդրումային նախագծերի իրականացման գործնական ասպեկտները, ինչպես նաև համագործակցության առաջնահերթ ոլորտներում, այդ թվում՝ կարևորագույն հանքանյութերի, տրանսպորտի, լոգիստիկայի և թվայնացման հետագա աշխատանքների հեռանկարները։