Մոսկվայում կքննարկեն լատվիական բանկի ակտիվների կալանքի վերաբերյալ գործը

Մոսկվայի օկրուգի արբիտրաժային դատարանը կքննարկի լատվիական Rietumu Banka բանկի բողոքը՝ կապված Ռուսաստանում նրա ակտիվների կալանքի հետ։ Այդ մասին հայտնում է ՌԻԱ Նովոստին՝ հղում անելով դատական նյութերին։

Դատական նիստը նշանակվել է հունիսի 15-ին։ Գործը կապված է Ռուսաստանի գլխավոր դատախազության հայցի հետ, որով պահանջվում է պետության եկամուտ ճանաչել «ԿԻ Ինվեստ» ընկերության և Rietumu Banka-ի վերահսկողության տակ գտնվող մի շարք այլ իրավաբանական անձանց ակտիվները։ Ըստ քննության վարկածի՝ այդ կառույցների միջոցով Ռուսաստանից միջոցներ են փոխանցվել Լատվիա։

Ավելի վաղ դատախազությունը պահանջել էր անվավեր ճանաչել Rietumu Banka-ի և «ԿԻ Ինվեստ»-ի միջև կնքված վարկային պայմանագիրը, ինչպես նաև բանկին փոխանցված ավելի քան 105 միլիոն ռուբլին։ Հետագայում գործի շրջանակում հայտնաբերվել են ևս մի շարք կազմակերպություններ, որոնք, ըստ նյութերի, շարունակել են վճարումներ իրականացնել լատվիական բանկին՝ շրջանցելով գործող սահմանափակումները։