Ռուսաստանում անցկացվել է հարցում՝ Պուտինի նկատմամբ վստահության մակարդակի վերաբերյալ

«Հասարակական կարծիք» հիմնադրամը (ՖՕՄ) հրապարակել է Ռուսաստանի քաղաքացիների շրջանում անցկացված հարցման արդյունքները, որոնք վերաբերում են նախագահ Վլադիմիր Պուտինի նկատմամբ վստահության մակարդակին։

Հարցման համաձայն՝ մասնակիցների 73 տոկոսը նշել է, որ ավելի շուտ վստահում է Ռուսաստանի նախագահին, մինչդեռ 16 տոկոսը հայտնել է հակառակ կարծիք։ Միաժամանակ հարցվածների 75 տոկոսը դրական է գնահատել Պուտինի գործունեությունը երկրի ղեկավարի պաշտոնում, իսկ 12 տոկոսը տվել է բացասական գնահատական։

Եթե Պետդումայի ընտրությունները կայանային առաջիկա կիրակի, հարցվածների 36 տոկոսը պատրաստ կլիներ աջակցել «Եդինայա Ռոսիա» կուսակցությանը, 12 տոկոսը՝ ԼԴՊՌ-ին, իսկ 8 տոկոսը՝ Կոմունիստական կուսակցությանը։ «Նոր մարդիկ» կուսակցության օգտին քվեարկելու պատրաստակամություն հայտնել է 6 տոկոսը, իսկ «Արդար Ռուսաստան»-ին՝ 3 տոկոսը։

Կառավարության աշխատանքը դրական է գնահատել հարցվածների 46 տոկոսը, իսկ վարչապետ Միխայիլ Միշուստինի գործունեությունը լավ է գնահատել 52 տոկոսը։ Հարցումն անցկացվել է հունիսի 5-7-ը՝ Ռուսաստանի 51 տարածաշրջանի 97 բնակավայրերում՝ 18 տարեկանից բարձր 1500 մասնակցի շրջանում։