Իրանը չի սկսի միջուկային բանակցություններ ԱՄՆ-ի հետ՝ առանց որոշակի պայմանների կատարման

Իրանի իշխանությունները պահանջում են ազատել 12 միլիարդ դոլարի սառեցված ակտիվները, վերացնել ծովային շրջափակումը և դադարեցնել նավթի վաճառքի վրա պատժամիջոցները՝ ԱՄՆ-ի հետ միջուկային ծրագրի շուրջ բանակցություններ սկսելու համար: Այս մասին հաղորդում է «Մեհր» լրատվական գործակալությունը՝ հղում անելով Թեհրանի և Վաշինգտոնի միջև կնքված հուշագրի նախագծին։

Փաստաթղթում նշվում է, որ Իրանը և ԱՄՆ-ն 60 օրվա ընթացքում կանցկացնեն միջուկային բանակցություններ, որոնք կհանգեցնեն համաձայնության: Սակայն, միջուկային երկխոսության մեկնարկից առաջ ամերիկյան իշխանությունները պարտավորվում են դադարեցնել իրանական նավթի և նավթամթերքի վաճառքի վրա պատժամիջոցները՝ սկզբում ազատելով սառեցված 12 միլիարդ դոլարի ակտիվները և ամբողջությամբ վերացնելով ծովային շրջափակումը։

Հուշագրի նախագծի համաձայն՝ 60 օրվա ընթացքում կողմերը պետք է համաձայնության գան, որը կներառի բոլոր առաջնային և երկրորդային պատժամիջոցների վերացումը, ինչպես նաև ՄԱԿ-ի Անվտանգության խորհրդի և Ատոմային էներգիայի միջազգային գործակալության (ՄԱԳԱՏԷ) կառավարիչների խորհրդի բանաձևերի չեղարկումը: Այս ժամանակահատվածում ԱՄՆ-ն պարտավոր կլինի ապասառեցնել իրանական ևս 12 միլիարդ դոլարի արտաքին ակտիվներ: