Հրապարակվել են Իրանի և ԱՄՆ-ի միջև հնարավոր խաղաղ համաձայնագրի 14 կետերը

Իրանական Mehr գործակալությունը հրապարակել է Իրանի և ԱՄՆ-ի միջև հակամարտության կարգավորման վերաբերյալ հուշագրի նախագծի հիմնական դրույթները։ Հրապարակման տվյալներով՝ տեղեկությունը տրամադրել է Թեհրանի բանակցային խմբին մոտ կանգնած աղբյուրը։

Փաստաթուղթը ներառում է 14 կետ և նախատեսում է ռազմական գործողությունների անհապաղ ամբողջական դադարեցում բոլոր ուղղություններով, այդ թվում՝ Լիբանանի տարածքում։ Բացի այդ, նախատեսվում է Իրանի նկատմամբ ծովային շրջափակման վերացում և Օրմուզի նեղուցի բացում՝ կողմերի միջև ձեռք բերված պայմանավորվածությունների հիման վրա։

Նախագծի համաձայն՝ Միացյալ Նահանգները պարտավորվում է հեռացնել իր ռազմական ներկայությունը Իրանի հարակից տարածքներից և հրաժարվել երկրի ներքին գործերին հետագա միջամտությունից։ Առանձին դրույթներով նախատեսվում է նաև իրանական նավթի նկատմամբ սահմանափակումների վերացում, Թեհրանի ֆինանսական միջոցների հասանելիության ապահովում և Իրանի վերականգնման ծրագիր՝ առնվազն 300 միլիարդ դոլարի չափով՝ ԱՄՆ-ի և նրա գործընկերների մասնակցությամբ։

Ավելի վաղ Իրանի արտաքին գործերի նախարարության ներկայացուցիչ Իսմայիլ Բաղային հայտարարել էր, որ Իրանի և ԱՄՆ-ի միջև փոխըմբռնման հուշագրի հիմնական դրույթների շուրջ համաձայնություն կա, սակայն ընդգծել էր, որ Վաշինգտոնի հակասական դիրքորոշումները նախկինում բազմիցս խոչընդոտել են բանակցային գործընթացը։