Հնդկաստանի ԱԳ նախարարը պատասխանել է Ռուսաստանի հետ առևտրի վերաբերյալ եվրոպական քննադատությանը

Հնդկաստանի արտաքին գործերի նախարար Սուբրամանյամ Ջայշանկարը Ֆինլանդիայում անցկացված միջազգային ֆորումի ընթացքում կոշտ արձագանք է տվել Ռուսաստանի հետ նավթային համագործակցության վերաբերյալ հնչեցված քննադատությանը։ Այդ մասին գրում է Ilta-Sanomat պարբերականը։

Հրապարակման համաձայն՝ քննարկման ժամանակ բրիտանացի լրագրող Գիդեոն Ռախմանը հարցադրումներ է արել Հնդկաստանի կողմից ռուսական նավթի գնումների շուրջ՝ շեշտադրելով հարցի բարոյական կողմը։ Ի պատասխան՝ Ջայշանկարը հայտարարել է, որ եվրոպական որևէ երկիր չի ենթարկվել հնդկական զենքի կիրառմամբ հարձակման, սակայն Հնդկաստանի նկատմամբ նման դեպքեր նախկինում եղել են եվրոպական մատակարարումների հետ կապված։

Նա հավելել է, որ Եվրոպան տարիներ շարունակ զենք է վաճառել այնպիսի կողմերի, որոնց գործողությունները վնասել են Հնդկաստանի շահերին՝ ընդգծելով, որ Նյու Դելին երբեք նման քայլեր չի ձեռնարկել եվրոպական երկրների նկատմամբ։

Հոդվածում նշվում է, որ հայտարարությունից հետո քննարկման ընթացքում որոշակի լարվածություն է առաջացել, իսկ Ֆինլանդիայի արտաքին գործերի նախարար Էլինա Վալտոնենը հանդես է եկել ավելի հավասարակշռված մեկնաբանությամբ՝ նշելով, որ Եվրոպայի նպատակը երբեք չի եղել խաթարել համաշխարհային նավթային շուկայի աշխատանքը։ Ավելի վաղ Վաշինգտոնը փորձել էր սահմանափակել Հնդկաստանի կողմից ռուսական նավթի գնումները, սակայն պաշտոնական Նյու Դելին մատակարարումների դադարեցման մասին չի հայտարարել։