100 Airbus A380 ինքնաթիռի զանգվածին համարժեք ամպ

«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանը գրել է․

«Ամենածանր ամպերը կույտաանձրևային (Cb) ամպերն են։ Նույնիսկ համեմատաբար փոքր կույտաանձրևային ամպի զանգվածը կարող է կազմել շուրջ 50 000 տոննա, իսկ ամենախոշորների դեպքում՝ հասնել մինչև 1 000 000 տոննայի։

Այս ամպերի ջրայնությունը տարբեր տարածաշրջաններում զգալիորեն տարբերվում է․ բարեխառն կլիմայական գոտում այն սովորաբար կազմում է 1–3 գ/մ³, իսկ արևադարձային շրջաններում՝ 4–6 գ/մ³։

Համեմատության համար՝ 1 գ/մ³-ը մոտավորապես մեկ կաթիլ ջուր է յուրաքանչյուր խորանարդ մետր օդում։ Թեև թվերը փոքր են թվում, սակայն տարբերությունը հսկայական է․ հենց այդ պատճառով արևադարձային գոտիներում մեկ ամպը կարող է ընդամենը մեկ ժամում թափել լճի ծավալին համարժեք ջուր։

Հետաքրքիր է նաև, որ շատ մարդիկ ֆիզիկապես զգում են նման ամպերի մոտեցումը՝ դեռևս մինչև առաջին որոտը։ Ոմանց մոտ կարող են ի հայտ գալ ծանրության զգացում, թուլություն, անհանգստություն կամ ինքնազգացողության փոփոխություններ, որոնք հաճախ կապված են մթնոլորտային պայմանների կտրուկ փոփոխությունների հետ»։