Տղամարդը 37 տարի անց պարզել է, որ հոր փոխարեն թաղել է անծանոթ մարդու

ԱՄՆ բնակիչ Մարկ Ուելսը տարիներ անց պատահաբար պարզել է, որ իր հոր փոխարեն թաղել է մեկ այլ մարդու։ Այդ մասին հայտնում է SWNS-ը։

Մարկի խոսքով՝ իր հայրը՝ Դեյլ Ուեյն Ուելսը, անհետացել էր 1985 թվականի փետրվարին՝ աշխատանքից տուն վերադառնալու ճանապարհին։ Ութ ամիս անց հայտնաբերվել էին մարդկային մնացորդներ՝ ընտանիքի բնակության վայրից մոտ վեց կիլոմետր հեռավորության վրա։ Այդ ժամանակ ընտանիքին հայտնել էին, որ դեպքը դժբախտ պատահարի հետևանք է եղել։

Տարիներ անց Մարկը որոշել է վերադառնալ դեպքի հանգամանքներին և 2019 թվականին հասել է աճյունի արտաշիրմմանը։ 2022 թվականին ստացված ԴՆԹ հետազոտության արդյունքները ցույց են տվել, որ գերեզմանում ամբողջ ընթացքում եղել է մեկ այլ մարդ, ոչ թե նրա հայրը։

Այս պահին իրավապահները փորձում են պարզել անհայտ անձի ինքնությունը և շարունակել են անհետացման գործի քննությունը։ Մարկ Ուելսը հայտարարել է, որ ցանկանում է վերջապես հասկանալ՝ իրականում ինչ է տեղի ունեցել իր հոր հետ։