Ուկրաինան և Մոլդովան սկսում են ԵՄ-ին անդամակցության բանակցությունների առաջին փուլը

Ուկրաինան և Մոլդովան երկուշաբթի կանցնեն Եվրոպական միությանը անդամակցության առարկայական բանակցությունների առաջին փուլին։ Բանակցային գործընթացի մեկնարկի արարողությունը կանցկացվի Լյուքսեմբուրգում՝ ԵՄ բարձրաստիճան ներկայացուցիչների և երկու երկրների նախարարների մասնակցությամբ, հայտնում է The Guardian-ը։

Բանակցությունների մեկնարկը համարվում է կարևոր քաղաքական քայլ Ուկրաինայի և Մոլդովայի համար, որոնք 2022 թվականին Եվրամիությանը անդամակցության թեկնածուի կարգավիճակ ստացան՝ Ուկրաինա ռուսական լայնածավալ ներխուժման սկսվելուց կարճ ժամանակ անց։ Չնայած 2024 թվականի հունիսին ընդունված բանակցությունները բացելու պաշտոնական որոշմանը՝ գործընթացի հետագա առաջխաղացումը երկար ժամանակ արգելափակվում էր Հունգարիայի կողմից։

Իրավիճակը փոխվեց Հունգարիայում իշխանափոխությունից հետո. անցյալ շաբաթ ԵՄ անդամ պետությունները միաձայն համաձայնեցրին բանակցությունների, այսպես կոչված, «առաջին կլաստերի» բացումը, որը ներառում է իրավունքի գերակայության, ժողովրդավարության և պետական ինստիտուտների գործունեության հարցեր։ Դրա մեկնարկը ճանապարհ է բացում ինտեգրման այլ ուղղությունների քննարկման համար՝ ներառյալ միասնական շուկան, բնապահպանական քաղաքականությունը և սոցիալ-տնտեսական հարցերը։

Եվրոպական հանձնաժողովի նախագահ Ուրսուլա ֆոն դեր Լայենը և Եվրոպական խորհրդի նախագահ Անտոնիու Կոշտան հայտարարեցին, որ Ուկրաինան և Մոլդովան ցույց են տվել «վճռականություն, խիզախություն և համառ աշխատանք բարեփոխումներ իրականացնելու գործում՝ նույնիսկ լուրջ մարտահրավերների պայմաններում»։

Ուկրաինայի նախագահ Վլադիմիր Զելենսկին բանակցությունների առաջին կլաստերի բացումն անվանել է երկրի համար կարևոր քաղաքական և բարոյական աջակցություն։ Միաժամանակ եվրոպացի պաշտոնյաները նշում են, որ անդամակցության ճանապարհը մնում է երկարատև։

ԵՄ-ին անդամակցելու համար թեկնածու պետությունները պետք է իրենց օրենսդրությունը համապատասխանեցնեն եվրոպական հազարավոր նորմերի և ստանան միության բոլոր անդամ երկրների միաձայն հավանությունը։ Եվրահանձնաժողովի գնահատմամբ, Ուկրաինան առայժմ իրականացրել է անցյալ տարվա վերջում ԵՄ-ի հետ համաձայնեցված տասը հիմնական ուղղությունների բարեփոխումների մոտ 15%-ը։

Դրանց թվում են՝ հակակոռուպցիոն մարմինների անկախության ուժեղացումը, հակակոռուպցիոն ռազմավարության ընդունումը և դատավորների ու դատախազների նշանակման ընթացակարգերի բարեփոխումը։

Բրյուսելում կարծում են, որ ներկայիս տեմպերի պահպանման դեպքում բանակցությունների տեխնիկական մասը կարող է տևել մոտ չորս տարի, սակայն անդամակցության վերաբերյալ վերջնական որոշումը կախված կլինի ոչ միայն չափանիշների կատարումից, այլև Եվրամիության անդամ պետությունների քաղաքական կամքից։