Իսրայելի պաշտպանnւթյան բանակը կարող է դադարեցնել hարձակnւմը Լիբանանում՝ ԱՄՆ-ի և Իրանի միջև համաձայնագրի շրջանակներում

Իսրայելի պաշտպանության բանակը կարող է դադարեցնել հարձակումը Հարավային Լիբանանում՝ ԱՄՆ-ի և Իրանի միջև կնքվող համաձայնագրի ֆոնին, սակայն անվտանգության գոտուց իսրայելական զորքերի դուրսբերում դեռևս չի նախատեսվում։ Այս մասին հայտնել է Իսրայելի Kan պետական հեռուստառադիոընկերությունը, հաղորդում է ՌԻԱ Նովոստի-ն։

«Միացյալ Նահանգների և Իրանի միջև կնքվող համաձայնագրի շրջանակներում ՑԱԽԱԼ-ը պատրաստվում է այն հավանականությանը, որ քաղաքական ղեկավարությունը հրաման կտա դադարեցնել զորքերի ցամաքային հարձակումը Լիբանանի հարավում։ Փաստացի, սրանք կարող են լինել վերջին օրերը, երբ ՑԱԽԱԼ-ը հնարավորություն ունի ուժ կիրառել՝ Լիբանանում նոր տարածքներ զբաղեցնելու նպատակով»,- ասվում է հեռուստառադիոընկերության հրապարակման մեջ:

Kan-ի տվյալներով՝ Իսրայելը պատրաստվում է կրճատել հարվածները Լիբանանի խորքում, որպեսզի չվնասի ԱՄՆ-ի և Իրանի միջև համաձայնագրին։

Միևնույն ժամանակ, անվտանգության ոլորտի իսրայելական աղբյուրները հեռուստառադիոընկերությանը հայտնել են, որ ՑԱԽԱԼ-ը Իրանի հետ համաձայնագրի շրջանակներում զորքերը դուրս չի բերելու Հարավային Լիբանանի անվտանգության գոտուց։ Նշվում է, որ այդ հարցը լիբանանցիների հետ քննարկվելու է ուղիղ բանակցությունների շրջանակներում, որոնք տեղի կունենան մեկուկես շաբաթից ԱՄՆ-ում։

Հիշեցնենք, որ ավելի վաղ Թրամփը հայտարարել էր, որ գործարքը կստորագրվի հունիսի 14-ին։ Միևնույն ժամանակ, Իրանի ԱԳՆ պաշտոնական ներկայացուցիչ Էսմայիլ Բաղային հայտարարել էր, որ ԱՄՆ-ի հետ հակամարտության կարգավորման հուշագրի ստորագրումը հունիսի 14-ին տեղի չի ունենա, սակայն չէր բացառել, որ այդ իրադարձությունը կկայանա առաջիկա օրերին։