Թրամփը սպառնում է Ֆրանսիային գինու վրա 100% մաքսատուրքով

ԱՄՆ նախագահ Դոնալդ Թրամփը զգուշացրել է Ֆրանսիային նոր առևտրային պատերազմի վտանգի մասին և սպառնացել է 100 տոկոս մաքսատուրք սահմանել ֆրանսիական գինիների և շամպայնի վրա, եթե Փարիզը չվերացնի ամերիկյան տեխնոլոգիական ընկերությունների թվային հարկը։

«Ես նրան (Ֆրանսիայի նախագահ Էմանուել Մակրոնին) խնդրեցի չհարկել ամերիկյան ընկերությունները, և եթե նրանք դա անեն, ես այլընտրանք չեմ ունենա, քան 100 տոկոս մաքսատուրք սահմանել Ֆրանսիայից եկող բոլոր շամպայնների և բոլոր գինիների վրա», - ասել է ամերիկացի առաջնորդը New York Post (NYP)-ին տված հարցազրույցում։

Թրամփը նշել է, որ ինքը ուղղակիորեն զգուշացրել է Մակրոնին՝ պահանջելով, որ նա վերացնի տեխնոլոգիական ընկերությունների 3 տոկոս հարկը։ Ինչպես հիշեցնում է հրատարակությունը, այս հարկը Ֆրանսիայում գործում է 2019 թվականից և հարկում է այնպիսի հսկաների տեղական եկամուտները, ինչպիսիք են Alphabet-ը, Amazon-ը և Apple-ը։