Ավստրալիան և Նոր Զելանդիան ողջունել են ԱՄՆ-Իրան համաձայնագիրը

Ավստրալիան և Նոր Զելանդիան ողջունել են ԱՄՆ-ի և Իրանի միջև կնքված համաձայնագիրը և հույս հայտնել Հորմուզի նեղուցով նավարկության ազատության արագ վերականգնման վերաբերյալ։

«Ավստրալիայի կառավարությունը ողջունում է Միացյալ Նահանգների և Իրանի միջև կնքված համաձայնագիրը», - հայտարարության մեջ ասել է Ավստրալիայի վարչապետ Էնթոնի Ալբանեզը։

Վարչապետը նշել է, որ Հորմուզի նեղուցը բացելու և նավարկության ազատությունը վերականգնելու համաձայնագրով նախատեսված քայլերը կարևոր են համաշխարհային էներգետիկ շուկաների և տնտեսության վրա ճնշումը մեղմելու համար։ «Այս կենսականորեն կարևոր առևտրային ուղու վերականգնումը կարևոր է համաշխարհային էներգետիկ շուկաների և համաշխարհային տնտեսության կարգավորման համար, այդ թվում՝ մեր տարածաշրջանում», - ասել է Ալբանեզը։

Նոր Զելանդիայի արտաքին գործերի նախարար Ուինսթոն Փիթերսը Միացյալ Նահանգների և Իրանի միջև կնքված համաձայնագիրը անվանել է «կարևոր քայլ՝ Մերձավոր Արևելքում լարվածությունը նվազեցնելու և կայունությունը խթանելու ուղղությամբ»։ «Հորմուզի նեղուցով նավագնացության խափանումը զգալի ազդեցություն է ունեցել Նոր Զելանդիայի տնտեսության վրա, և մենք ողջունում ենք այն քայլերը, որոնք թույլ կտան անվտանգ կերպով վերաբացել այս կենսականորեն կարևոր նավագնացության ուղին», - ասել է Փիթերսը։