Reuters․ ԱՄՆ-ն և Իրանը համաձայնության են եկել դադարեցնել պատերազմը և վերաբացել Հորմուզի նեղուցը

ԱՄՆ-ն և Իրանը հայտարարել են, որ հասել են նախնական համաձայնության՝ ռազմական հակամարտությունը դադարեցնելու և Հորմուզի նեղուցը վերաբացնելու շուրջ։ Reuters-ի փոխանցմամբ՝ համաձայնությունը դեռևս շրջանակային բնույթ ունի, սակայն այն արդեն գնահատվում է որպես վերջին ամիսների ամենակարևոր դիվանագիտական առաջընթացներից մեկը։

ԱՄՆ նախագահ Դոնալդ Թրամփը հայտարարել է, որ Իրանի հետ համաձայնության շուրջ աշխատանքը ավարտված է, իսկ հուշագրի պաշտոնական ստորագրումը նախատեսվում է իրականացնել ուրբաթ օրը՝ Շվեյցարիայում։ Միջնորդական դեր է կատարել Պակիստանը։ Ըստ հրապարակված տվյալների՝ պայմանավորվածությունը նախատեսում է ռազմական գործողությունների դադարեցում բոլոր ուղղություններով, այդ թվում՝ Լիբանանի տարածքում։

Հաղորդվում է, որ համաձայնության շրջանակում նախատեսվում է նաև Հորմուզի նեղուցի վերաբացում և Իրանի նավահանգիստների նկատմամբ ամերիկյան սահմանափակումների վերացում։ Միաժամանակ Իրանի միջուկային ծրագրի հարցը հետաձգվել է հաջորդ փուլ և նախատեսվում է քննարկել առանձին բանակցությունների ընթացքում՝ 60-օրյա հրադադարի ընթացքում։ Տարածաշրջանային լարվածության թուլացման սպասումները անմիջապես ազդել են համաշխարհային շուկաների վրա․ Brent տեսակի նավթի գինը նվազել է ավելի քան 4 տոկոսով, իսկ ասիական ֆոնդային շուկաներում արձանագրվել է աճ։

Միաժամանակ Իսրայելը հայտարարել է, որ չի հանդիսանալու համաձայնության կողմ և շարունակելու է իր անվտանգության քաղաքականությունը տարածաշրջանում։