Ուրոլոգը զգուշացրել է լողափնյա հանգստի անսպասելի վտանգի մասին տղաների համար

Սովորական ծովափնյա ավազը կարող է երեխաների, մասնավորապես տղաների մոտ առաջացնել բորբոքային խնդիրներ, զգուշացրել է մանկական վիրաբույժ, ուրոլոգ և անդրոլոգ, բժշկական գիտությունների թեկնածու Միխայիլ Նիկիտսկին։

Մասնագետի խոսքով՝ լողափում խաղալու կամ լողալու ընթացքում ավազի մանր մասնիկները կարող են հայտնվել մաշկի ծալքերում և տղաների մոտ՝ նաև համապատասխան հատվածներում։ Եթե լողափից հետո երեխան մանրակրկիտ չլվացվի, ավազը կարող է մնալ մաշկի վրա և առաջացնել գրգռում։

Բժշկի խոսքով՝ սկզբում կարող են ի հայտ գալ կարմրություն և անհարմարավետություն, իսկ հետագայում՝ զարգանալ բորբոքային գործընթաց։ Որոշ դեպքերում անհրաժեշտ է լինում արդեն բժշկական միջամտություն։

Նիկիտսկին պատմել է նաև իր պրակտիկայից մի դեպք, երբ երեխայի մոտ խաղի ընթացքում ավազի կուտակման հետևանքով զարգացել էին արտահայտված այտուց և բորբոքում։

Խնդիրներից խուսափելու համար մասնագետը խորհուրդ է տվել լողափից հետո երեխաներին պարտադիր լողացնել ցնցուղի տակ՝ զգուշորեն մաքրելով մաշկի ծալքերը և խուսափելով կոպիտ լվացքի պարագաներից։ Եթե երեխայի մոտ առաջանան կարմրություն, այտուց, ցավ կամ բողոքներ անհարմարության մասին, անհրաժեշտ է դիմել բժշկի։