Ժնևում G7-ի դեմ բողոքի ցույցի ընթացքում այրել են Tesla և վնասել ՄԱԿ-ի գրասենյակը

Շվեյցարիայի Ժնև քաղաքում G7 գագաթնաժողովի նախաշեմին անցկացված բողոքի ակցիայի ընթացքում ցուցարարները հրդեհել են Tesla մակնիշի ավտոմեքենա և վնասել ՄԱԿ-ի կառույցներից մեկի գրասենյակի պատուհանները։ Reuters-ի փոխանցմամբ՝ իրավիճակի սրման հետևանքով ոստիկանությունը կիրառել է արցունքաբեր գազ։

Տեղեկությունների համաձայն՝ ցույցին մասնակցել է շուրջ 20 հազար մարդ։ Սկզբում երթն անցել է խաղաղ, սակայն ավելի ուշ մի խումբ մասնակիցներ սկսել են թիրախավորել այն օբյեկտները, որոնք իրենց կարծիքով խորհրդանշում են կապիտալիզմն ու գլոբալ քաղաքական ազդեցությունը։

Ականատեսների փոխանցմամբ՝ ցուցարարները փողոցներից քարեր են պոկել և նետել իրավապահների ուղղությամբ, իսկ արցունքաբեր գազի տարածման հետևանքով քաղաքի կենտրոնում խուճապային իրավիճակ է առաջացել։ Բողոքի մասնակիցներից մեկը հայտարարել է, որ G7-ը դիտարկում է որպես քաղաքական և տնտեսական ուժի կենտրոնացում, որը խորացնում է անհավասարությունը։ Մեկ այլ մասնակից էլ ուշադրություն է հրավիրել գենդերային անհավասարության թեմային։

Հունիսի 15-17-ը Ֆրանսիայի Էվիան-լե-Բեն քաղաքում անցկացվող G7 գագաթնաժողովում նախատեսվում է քննարկել Մերձավոր Արևելքի և Ուկրաինայի շուրջ զարգացումները, ինչպես նաև մի շարք տնտեսական և անվտանգային հարցեր։