Նախատեսվում է իրականացնել Սիսիան, Գորիս և Մեղրի համայնքների ոռոգման համակարգերի վերականգնում և արդիականացում

Հայաստանի Հանրապետությունում ջրային եւ ոռոգման ենթակառուցվածքների զգալի մաշվածությունը, ջրի կորուստների բարձր մակարդակը, ինչպես նաեւ կլիմայական փոփոխություններով պայմանավորված ռիսկերի աճը լուրջ մարտահրավերներ են ջրային ռեսուրսների արդյունավետ կառավարման եւ գյուղատնտեսության կայուն զարգացման համար: Ծրագիրն առաջարկում է համալիր եւ փուլային լուծում՝ անդրադառնալով ազգային եւ տեղական մակարդակներում առկա խնդիրներին՝ միաժամանակ ծրագրի երկու պիլարներով: Այս մասին ասել է ՀՀ տարածքային կառավարման եւ ենթակառուցվածքների նախարարության ջրային կոմիտեի նախագահի տեղակալ Նվարդ Վարդանյանը՝ ԱԺ ֆինանսավարկային եւ բյուջետային հարցերի մշտական հանձնաժողովի արտահերթ նիստում հունիսի 15-ին քննարկման ներկայացնելով «Հայաստանի Հանրապետության եւ Զարգացման ֆրանսիական գործակալության (ԶՖԳ) միջեւ չհաստատված վարկային գիծ տրամադրելու մասին թիվ CAM 1029 շրջանակային համաձայնագիրը վավերացնելու մասին» օրենքի նախագիծը:

Շրջանակային համաձայնագիրը ստորագրվել է 2025 թվականի դեկտեմբերի 18-ին եւ 19-ին:

Համաձայնագրով նախատեսվում է ՀՀ Սյունիքի մարզում ոռոգման ենթակառուցվածքների բարելավման, ինչպես նաեւ «Հայաստանում ջրային ռեսուրսների եւ գյուղատնտեսության ոլորտի համալիր զարգացում»/WAIDA (որը ներառում է նաեւ «Ջրային եւ ոռոգման ծառայությունների բարելավման» ծրագիրը/WISE) ջրային ծրագրի իրականացման նպատակով վարկային միջոցների տրամադրում:

Մասնավորապես, նախատեսվում է իրականացնել Սիսիան, Գորիս եւ Մեղրի համայնքների ոռոգման համակարգերի վերականգնում եւ արդիականացում փուլային եղանակով՝ ինքնահոս համակարգեր, պոմպակայաններ, ջրի կրկնակի օգտագործման համակարգեր, խորհրդատվական ծառայություններ:

Ծրագիրը հիմնվելու է չորս հիմնական բաղադրիչների վրա:

Զեկուցողի տեղեկացմամբ ԶՖԳ-ի ֆինանսավորումը կազմված է առավելագույնը 100 միլիոն եվրո բազմատրանշ վարկային գծից, որը փոխանցվելու է երեք տրանշով: Առաջին՝ ՀՀ Սյունիքի մարզի ֆինանսավորման վարկը՝ 30 մլն եվրո: Երկրորդ՝ «Ջրային եւ ոռոգման ծառայությունների բարելավման» ծրագրի (WISE) ֆինանսավորման վարկի առաջին մասնաբաժինը՝ առավելագույնը 30 մլն եվրո եւ երրորդ՝ «Ջրային եւ ոռոգման ծառայությունների բարելավման» ծրագրի (WISE) ֆինանսավորման վարկի երկրորդ մասնաբաժինը՝ առավելագույնը 40 մլն եվրո:

WISE ծրագրի համաֆինանսավորողը Համաշխարհային բանկն է:

Տեխնիկական աջակցություն տրամադրելու նպատակով ԵՄ կողմից նախատեսվում է նաեւ 12.456 մլն եվրո դրամաշնորհ:

Հանձնաժողովը դրական եզրակացություն է տվել օրենքի նախագծին: Այն նախատեսվում է քննարկել ԱԺ առաջիկա հերթական նիստերի ընթացքում: