Լավրովը եվրոպական արժեքները կապել է ռուսների իրավունքների սահմանափակման հետ

ՌԴ արտգործնախարար Սերգեյ Լավրովը հայտարարել է, որ ներկայիս տեսքով Եվրոպան չի կարող օգտակար դեր ունենալ Ուկրաինայի հակամարտության կարգավորման գործընթացում։ Այդ մասին նա ասել է Բելառուսի արտգործնախարար Մաքսիմ Ռիժենկովի հետ բանակցություններից հետո կայացած մամուլի ասուլիսում։

Լավրովը հիշեցրել է Եվրահանձնաժողովի նախագահ Ուրսուլա ֆոն դեր Լայենի հայտարարությունները՝ Ուկրաինային մինչև վերջ աջակցելու վերաբերյալ և նշել, որ այդ մոտեցման մեջ տեսնում է նաև ռուսների և ռուսախոս բնակչության իրավունքների սահմանափակման գաղափար։

Նրա խոսքով՝ ինքը չի հավատում, որ Եվրոպան ներկայիս քաղաքական դիրքավորմամբ կարող է նպաստել արդար կարգավորմանը և կարծում է, որ եվրոպական երկրները հակված են խոչընդոտել այդ գործընթացին։

Ավելի վաղ Լավրովը նաև քննադատել էր Գերմանիային՝ հայտարարելով, որ այնտեղ կրկին ի հայտ են գալիս մոտեցումներ, որոնք, իր գնահատմամբ, կապված են պատմական նացիստական ժառանգության հետ։