Մխիթար Հայրապետյանի գլխավորած պատվիրակությունը Փարիզում մասնակցում է «EUROSATORY 2026» միջազգային ցուցահանդեսին

Հասարակություն 15 Հունիս, 2026 19:00

ՀՀ բարձր տեխնոլոգիական արդյունաբերության նախարար Մխիթար Հայրապետյանի գլխավորած պատվիրակությունը Ֆրանսիայի զինված ուժերի և վետերանների հարցերով նախարար Կատրին Վոտրենի հրավերով Ֆրանսիայում է՝ մասնակցելու Փարիզում հունիսի 15-ին մեկնարկած պաշտպանական տեխնոլոգիաների միջազգային ցուցահանդեսին՝ «Eurosatory 2026»-ին:

Նախարարության աջակցությամբ հայկական ռազմարդյունաբերական ոլորտի 30 կազմակերպություն (18-ը՝ որպես ցուցադրող, 12-ը՝ որպես այցելու) «Eurosatory 2026»-ին մասնակցում է մեկ միասնական տաղավարով՝ միջազգային հարթակում ներկայացնելով հայկական արտադրական և գիտահետազոտական ներուժը։

Հայ-ֆրանսիական տեխնոլոգիական գործընկերությունը նոր թափ է ստացել այս տարվա մայիսի 5-ին Ֆրանսիայի նախագահ Էմանուել Մակրոնի՝ Հայաստան կատարած պաշտոնական այցից հետո։ Հայաստանի Հանրապետության բարձր տեխնոլոգիական արդյունաբերության նախարարության և Ֆրանսիայի Հանրապետության պաշտպանության նախարարության միջև ստորագրված հուշագիրը նոր հնարավորություններ է բացել երկու երկրների համար, և այս այցը հիշյալ պայմանավորվածությունների գործնական մեկնարկն է։

1967 թվականից անցկացվող միջոցառումն այս տարի մեկտեղել է ավելի քան 2300 ընկերություն աշխարհի 66 երկրից, 42 ազգային ներկայացուցչական տաղավարով: Միջոցառման շրջանակում նախատեսվում է ավելի քան 120 պանելային քննարկում և ցուցադրություն։ Օրակարգի առանցքում են ռազմարդյունաբերության, անօդաչու համակարգերի, հետախուզական տեխնոլոգիաների և արդիական սպառազինության, կիբեռանվտանգության, արհեստական բանականության ոլորտներում համագործակցության հեռանկարները, ինչպես նաև ոլորտի զարգացման միտումներն ու մարտահրավերների հաղթահարման նորարարական լուծումները։

Նորագույն տեխնոլոգիաներով հագեցած ռազմարդյունաբերական համալիրի զարգացումը ՀՀ կառավարության օրակարգային առաջնահերթություններից է։ «Eurosatory 2026» հեղինակավոր միջոցառումը մեր երկրի համար աննախադեպ հնարավորություն է՝ ռազմարդյունաբերության ոլորտում միջազգային կապերի հաստատման, արտադրական ու գիտահետազոտական կարողությունների ընդլայնման, ինչպես նաև արտաքին շուկաների ուսումնասիրության համար։

Այցի շրջանակում՝ մինչև հունիսի 19-ը, նախարար Մխիթար Հայրապետյանը Ֆրանսիայում կունենա մի շարք աշխատանքային հանդիպումներ՝ ֆրանսիական գերատեսչությունների և ռազմարդյունաբերական ոլորտի ղեկավարների հետ: