Ռուսաստանում հայտնել են Starlink կապի խափանման նոր համակարգի կիրառման մասին

Ռուսաստանում սկսել են կիրառել «Վոլնա Կուպոլ Գարանտ» անվանումով ռադիոէլեկտրոնային պայքարի համակարգ, որը նախատեսված է Starlink արբանյակային կապի ալիքների խափանման համար։ Այդ մասին հայտնում է «Военный осведомитель» Telegram ալիքը։

Հրապարակման համաձայն՝ համակարգը բաղկացած է մի քանի կցորդներից, որոնց վրա տեղադրված են հատուկ ալեհավաքներ՝ ռադիոթափանցիկ ծածկի տակ։ Անհրաժեշտության դեպքում դրանք կարող են տեղակայվել նաև առանձին հարթակների վրա։

Նշվում է, որ համակարգը ենթադրաբար խանգարումներ է ստեղծում Starlink-ի աշխատանքի համար՝ ազդելով հատկապես այն սարքավորումների վրա, որոնք կիրառվում են անօդաչու սարքերի կառավարման նպատակով։

Ըստ հրապարակված տվյալների՝ մեկ համալիրն ապահովում է մոտ 20 քառակուսի կիլոմետր տարածքի ծածկույթ։ Հաղորդվում է նաև, որ նման համակարգեր կարող են տեղակայված լինել ռազմավարական ուղղություններով։

Ավելի վաղ Ռուսաստանում հայտարարել էին արբանյակային կառավարմամբ ծանր անօդաչու սարքերի մշակման աշխատանքների մասին։