Փոփոխություններ՝ «Մասնագիտական կրթության և ուսուցման մասին» օրենքում (տեսանյութ)
ՀասարակությունԱԺ հերթական նիստում այսօր առաջին ընթերցմամբ քննարկվել է «Մասնագիտական կրթության և ուսուցման մասին» օրենքում լրացումներ և փոփոխություններ կատարելու, ինչպես նաև մի շարք հարակից օրենքներում փոփոխություններ նախատեսող օրենսդրական փաթեթը։
Հարցը զեկուցել է ՀՀ կրթության, գիտության, մշակույթի և սպորտի նախարար Ժաննա Անդրեասյանը։ Նախարարն ընդգծել է, որ 2024 թվականին Ազգային ժողովն ընդունել է «Մասնագիտական կրթության և ուսուցման մասին» նոր օրենքը, որն այս համակարգում ունեցել է հեղափոխական նշանակություն։ Նրա դիտարկմամբ՝ ներդրված մեթոդները, մոտեցումները և Կառավարության վարած քաղաքականությունը հանգեցրել են նրան, որ այսօր մասնագիտական կրթության և ուսուցման ոլորտը դարձել է առավել գրավիչ․ ներկայում ՄԿՈՒ հաստատություններում սովորում է ավելի քան 47 հազար ուսանող։
Ժաննա Անդրեասյանը տեղեկացրել է, որ առաջարկվող փոփոխությունները բխում են բարեփոխումների իրականացման ընթացքում ի հայտ եկած մի շարք կիրարկման առանձնահատկություններից և դրանք կարգավորելու անհրաժեշտությունից։ Մասնավորապես՝ փոփոխություններ են առաջարկվում լիցենզավորման և հավատարմագրման գործընթացներում՝ դրանք դարձնելով ավելի սահուն և համադրելի բարձրագույն կրթության համակարգում զուգահեռաբար ընթացող բարեփոխումներին, ինչպես նաև կարգավորելու անցումային ժամանակահատվածը։
Փոփոխություններ և համապատասխան կարգավորումներ են նախատեսվում նաև մի շարք ուղղություններով, որոնք վերաբերում են շնորհվող որակավորումներին, աշխատանքի վրա հիմնված ուսումնառության կազմակերպմանը, ՄԿՈՒ համակարգում մանկավարժահոգեբանական աջակցության ծառայությունների տրամադրմանը, ինչպես նաև ոլորտի համար կարևոր նշանակություն ունեցող մանկավարժական աշխատողների ատեստավորման և տարակարգի շնորհման գործընթացներին։
ԿԳՄՍ նախարարը հիշեցրել է, որ այդ մեխանիզմներն արդեն գործում են։ Մասնավորապես՝ ոլորտում արդեն երկու տարի է՝ ինչ ներդրված է ատեստավորման համակարգը, որը հնարավորություն է տվել մասնագիտական կրթության առանձին ուղղություններում աշխատավարձն ավելի քան կրկնապատկել հարյուրավոր դասախոսների և վարպետների համար։ Այս տարվանից գործարկվել է նաև տարակարգերի համակարգը։ Արդեն առկա են դիմումներ, և առաջիկայում կլինեն առաջին տարակարգ ստացած մասնագետները։ Ժաննա Անդրեասյանի ընդգծմամբ՝ օրենսդրական փաթեթը կամբողջացնի ոլորտի բարելավված իրավական միջավայրը։
ԱԺ գլխադասային հանձնաժողովի դրական եզրակացությունը ներկայացրել է ԳԿՄՍԵՍ հարցերի մշտական հանձնաժողովի նախագահի տեղակալ Թագուհի Ղազարյանը:
ՈՒՂԻՂ ԵԹԵՐ
Ամենադիտված 
Դերասանին մեղադրում են մանկապղծության մեջ․ նա ձերբակալվել է
