Թրամփ. ԱՄՆ-ը կցանկանար համաձայնագիր կնքել Ռուսաստանի և Չինաստանի հետ միջուկային զինանոցների կրճատման վերաբերյալ

ԱՄՆ նախագահ Դոնալդ Թրամփը հայտարարել է, որ Միացյալ Նահանգները կցանկանար համաձայնության գալ Ռուսաստանի և Չինաստանի հետ՝ նրանց միջուկային զինանոցները կրճատելու վերաբերյալ։

Ինչպես նա ասել է Ֆրանսիայում «Յոթի խմբի» (G7) գագաթնաժողովի շրջանակներում կայացած մամուլի ասուլիսում, Միացյալ Նահանգներն ունի միջուկային զենքի ամենամեծ զինանոցը, Ռուսաստանը երկրորդն է, իսկ Չինաստանը ակտիվորեն ընդլայնում է իր զինանոցը և կարող է հինգ տարի անց հավասարվել դրանց։

«Եվ մենք պետք է ունենանք միջուկային զենքի չեզոքացման համաձայնագիր, դա բացարձակապես հրաշալի կլիներ։ Մեզ այդ ամենը պետք չէ, մեզ պետք չէ աշխարհը 300 անգամ պայթեցնելու ունակությունը։ Անկեղծ ասած՝ դա պարզապես սարսափելի է», - ասել է Սպիտակ տան ղեկավարը։

«Եթե մենք կարողանայինք միջուկային զենքի չեզոքացման համաձայնագիր ունենալ, ես շատ կուրախանայի։ Եվ այդ երկու կողմերից մեկը իսկապես ուզում է դա։ Ես ձեզ կասեմ, որ մյուս կողմը այդքան էլ չի ուզում դա, և ձեզ երկուսն էլ պետք են», - եզրափակել է նա։