Ֆինլանդիան ԱՄՆ-ից ռումբեր կգնի F-35 կործանիչների համար

Ֆինլանդիան Միացյալ Նահանգներից կգնի GBU-53 սահող ռումբեր՝ F-35 կործանիչները հագեցնելու համար։ Այս մասին հայտարարել է Ֆինլանդիայի պաշտպանության նախարարությունը իր պաշտոնական կայքում։

Մամուլի հաղորդագրության մեջ նշվում է, որ Ֆինլանդիայի պաշտպանության նախարար Անտի Հաքանենը լիազորել է Պաշտպանության ուժերին գնել ամերիկյան Raytheon ընկերության կողմից արտադրված զինամթերքը՝ Միացյալ Նահանգների հետ ռազմական համագործակցության ծրագրի շրջանակներում։ «Այս գնումը լրացնում է F-35-ի համապարփակ ձեռքբերման ծրագրի շրջանակներում նախկինում տրված պատվերը։ Սա ներկայացնում է նոր հնարավորություն, որը կամրապնդի Ֆինլանդիայի պաշտպանական կարողությունները», - նշել է Հաքանենը։

Մամուլի հաղորդագրության համաձայն՝ ռումբերից բացի, համաձայնագիրը ներառում է պահեստամասերի, տեխնիկական փաստաթղթերի, անձնակազմի վերապատրաստման, ինչպես նաև վերանորոգման և սպասարկման ծառայությունների մատակարարում։