Կադիրովի երեխաները հանդիպել են Սաուդյան Արաբիայի արքայազնի հետ

Չեչնիայի ղեկավար Ռամզան Կադիրովի որդիները՝ Ալի, Ախմատ և Ադամ Կադիրովները, հանդիպում են անցկացրել Սաուդյան Արաբիայի արքայազն Թուրքի բեն Մուհամմեդ Ալ Սաուդի հետ։ Այդ մասին հայտնել է Ռամզան Կադիրովը։

Հաղորդվում է, որ Չեչնիայի կառավարության կազմում ֆիզիկական կուլտուրայի և սպորտի նախարարի պաշտոնը զբաղեցնող Ախմատ Կադիրովը արքայազնին փոխանցել է հոր ուղերձը՝ հասցեագրված Սաուդյան Արաբիայի ղեկավար Մուհամմեդ բեն Սալման Ալ Սաուդին։

Կադիրովի խոսքով՝ նման հանդիպումները նպաստում են փոխըմբռնման ամրապնդմանը, բարեկամական հարաբերությունների զարգացմանը և տարբեր ուղղություններով համագործակցության ընդլայնմանը։

Հանդիպման կազմակերպման պատճառների և այն հանգամանքի մասին, թե ինչու Չեչնիայի ղեկավարը անձամբ չի մասնակցել հանդիպմանը, լրացուցիչ մանրամասներ չեն ներկայացվել։