Եվրամիությունում քննարկում են ՌԴ քաղաքացիներին արդեն տրված շենգենյան վիզաների վերանայման հնարավորությունը

Եվրամիության երկրներում քննարկվում է արդեն տրամադրված շենգենյան վիզաների և կեցության թույլտվությունների վերանայման հնարավորությունը ռուսաստանցի քաղաքացիների համար։ Այդ մասին հայտնում է ՏԱՍՍ-ը՝ հղում անելով դիվանագիտական աղբյուրներին։

Աղբյուրի տվյալներով՝ թեման քննարկումների փուլում է գտնվում դեռևս մարտ–ապրիլ ամիսներից, սակայն ԵՄ անդամ երկրները դեռևս միասնական համաձայնության չեն հասել։

Ըստ հրապարակման՝ խոսքը կարող է վերաբերել այն անձանց, որոնք աշխատել են ռուսական ընկերություններում կամ հրապարակային դիրքորոշում են հայտնել Ռուսաստանի քաղաքականության, այդ թվում՝ Ուկրաինայի շուրջ իրադարձությունների վերաբերյալ։

Հնարավոր որոշումների պաշտոնական հիմնավորումը կարող է ներկայացվել անվտանգության նկատառումներով։

Ավելի վաղ զբոսաշրջության ոլորտի ներկայացուցիչները նշել էին, որ ռուսաստանցիների համար Եվրոպա մեկնելը վերջին շրջանում բարդացել է նաև շենգենյան փաստաթղթերի ձևակերպման սահմանափակ հնարավորությունների պատճառով։