Պետական հավաստագրերի միջոցով հաշմանդամություն ունեցող անձանց տրամադրվող աջակցող միջոցների ցանկը համալրվել է 37 նոր պարագայով

Պետական հավաստագրերի միջոցով հաշմանդամություն ունեցող անձանց տրամադրվող աջակցող միջոցների ցանկը համալրվել է 37 նոր պարագայով․ արդյունքում՝ տրամադրվող աջակցող միջոցների ընդհանուր թիվը դարձել է 162։ Կառավարությունն այսօր հաստատել է որոշման նախագիծը։

Միաժամանակ, 2027 թվականին նախատեսվող աջակցող միջոցները կտրամադրվեն 2026 թվականի հուլիսի 1-ից։ Քաղաքացիները հնարավորություն կունենան ստանալ հետևյալ նոր պարագաները՝ ակտիվ անվասայլակ, քայլակ–հենակ, բարձրությունը կարգավորող եռակետ կամ քառակետ ձեռնափայտեր, բազմաֆունկցիոնալ ակտիվ-աթոռ անվասայլակ, մանուալ անվասայլակ կեցվածքային աջակցությամբ, միզահեռացման կատետր, ստոմայի պարկ, խոսք չունեցող քաղաքացիների դեպքում հաղորդակցման համար նախատեսված աջակցող միջոցներ՝ օրինակ ձայնի անհատական ուժեղացուցիչ, զգայական էկրանով համակարգիչ կամ պլանշետներ աչքով կառավարելու համար, լոգանքի կազմակերպման հարմարեցումներ, սանիտարական աթոռ-սայլակ: 

Բարձրացվում են նաև որոշ պարագաների փոխհատուցման արժեքները.    

․ գիշերային կորսետ՝ 60 հազար դրամ (40 հազար դրամի փոխարեն), 

․ գլխի օրթեզ՝ 150 հազար դրամ (100 հազար դրամի փոխարեն),

․ լսողական սարք՝ 90 հազար դրամ (36 հազար դրամի փոխարեն) և 180 հազար դրամ (80 հազար դրամի փոխարեն), 

․ էլեկտրական անվասայլակ՝ 700 հազար դրամ (380 հազար դրամի փոխարեն):   

 Որոշման համաձայն՝ «Զինապահ» հիմնադրամի շահառուներին տրամադրված աջակցող միջոցների ֆինանսավորումը կկատարվի նույն հիմնադրամի կողմից։ 

Նշենք, որ մինչ օրս ընդհանուր առմամբ 50880 անձի տրամադրվել է 250067 աջակցող միջոց։