Ֆրանսիան որոշել է Կարոլ II-ի թոռանը արտահանձնել Ռումինիային

Փարիզի վերաքննիչ դատարանը որոշում է կայացրել Ռումինիայի նախկին թագավոր Կարոլ II-ի (1893-1953) թոռ Պոլ-Ֆիլիպ Հոհենցոլեռնին արտահանձնել Ռումինիային: Այս մասին հաղորդել է Ştirile ProTV-ն:

Հեռուստաալիքի տվյալներով՝ դատավճռից հետո ֆրանսիական իշխանությունները չեն կարողացել գտնել նախկին թագավորի թոռանը իր տանը և նրան ներառել են միջազգային հետախուզման մեջ գտնվող անձանց ցուցակում:

Նշվում է, որ Պոլ-Ֆիլիպն ունի հինգ օր՝ որոշումը բողոքարկելու համար: Ռումինիայի արդարադատության նախարարությունը հայտարարել է, որ Փարիզի դատարանի որոշումը «Ֆրանսիայի և Ռումինիայի միջև արդյունավետ համագործակցության հաջողություն է»:

Digi24 հեռուստաալիքի տվյալներով՝ 2025 թվականի ապրիլին Պոլ-Ֆիլիպը ձերբակալվել է Ֆրանսիայում և տնային կալանքի տակ է դրվել ռումինական իրավապահ մարմինների պահանջով: Ռումինիայում նա մեղադրվում է կոռուպցիայի, փողերի լվացման և նախկինում թագավորական ընտանիքին պատկանող հողամասերի հետ կապված խարդախության մեջ: