Լավրովը կանխատեսել է ԱՄՆ դիրքորոշման փոփոխություն Ուկրաինայի հարցում

Ռուսաստանի արտգործնախարար Սերգեյ Լավրովը հայտարարել է, որ Մոսկվայում չեն բացառում, որ ԱՄՆ-ը կարող է կրկին փոխել իր մոտեցումը Ուկրաինայի շուրջ կարգավորման գործընթացում։ Այդ մասին հայտնում է ՌԻԱ Նովոստին։

«Մեզ մոտ մտահոգություններ չկան։ Բայց կա զգացողություն, որ մոտեցումների հերթական փոփոխությունը հնարավոր է, ինչպես դա տեղի ունեցավ Անկորիջում կայացած հանդիպումից հետո, երբ ձեռք էին բերվել որոշակի փոխըմբռնումներ», — նշել է Լավրովը։

Նրա խոսքով՝ Միացյալ Նահանգները շարունակում է աջակցել Կիևին՝ ինչպես Ռուսաստանի նկատմամբ գործող և նոր սահմանափակումների միջոցով, այնպես էլ ուկրաինական ռազմարդյունաբերական համալիրին աջակցող հատուկ ծրագրերով։

Ավելի վաղ տեղեկություններ էին տարածվել ԱՄՆ-ի, Ռուսաստանի և Ուկրաինայի միջև բանակցային շփումների վերականգնման մասին։ Քննարկվող տարբերակներից մեկը, ըստ հրապարակումների, հրադադարի իրականացումն է երկու փուլով։