Քիր Սթարմերը հունիսի 22-ին կարող է հայտարարել հրաժարականի մասին. The Observer

Մեծ Բրիտանիայի վարչապետ Քիր Սթարմերը կարող է հայտարարել իր հրաժարականի մասին հունիսի 22-ին՝ իշխող Լեյբորիստական կուսակցության պատգամավորների կողմից վստահության կորստի կապակցությամբ։ Այս մասին հայտնել է The Observer շաբաթաթերթը՝ հղում անելով աղբյուրներին։

Դրա տվյալներով՝ Սթարմերը նախարարների կաբինետի անդամների, իր խորհրդականների, արհմիությունների առաջնորդների և Լեյբորիստական կուսակցության դոնորների հետ զրույցներից հետո եկել է այն եզրակացության, որ այլևս չի կարող զբաղեցնել Դաունինգ սթրիթ, 10 հասցեում գտնվող գրասենյակը: Ակնկալվում է, որ նա իր հեռացման մասին կհայտարարի հաջորդ շաբաթ, հնարավոր է՝ արդեն հունիսի 22-ին։ Ըստ պարբերականի՝ Սթարմերը կորոշի իր հեռացման ժամկետները՝ իշխանության կարգավորված փոխանցումն ապահովելու համար։ Շատ հավանական է, որ նա պաշտոնապես կլքի իր պաշտոնը սեպտեմբերին՝ Լեյբորիստական կուսակցության համագումարից առաջ։

Ավելի վաղ Սթարմերը հայտարարել էր, որ կամավոր հրաժարական չի տա այն բանից հետո, երբ իր կուսակից, Մեծ Մանչեսթեր կոմսության քաղաքապետ Էնդի Բերնեմը հաղթեց Բրիտանիայի խորհրդարանի Համայնքների պալատի (ստորին պալատ) լրացուցիչ ընտրություններում։ Համարվում է, որ այժմ Բերնեմը կարող է մարտահրավեր նետել Սթարմերի առաջնորդությանը, որը կորցրել է Լեյբորիստական կուսակցության ձախ թևի աջակցությունը։

Քաղաքական ճգնաժամը Մեծ Բրիտանիայում բռնկվել է տեղական ինքնակառավարման մարմինների ընտրություններից հետո, որոնք անցկացվել են մայիսի 7-ին։ Դրանց արդյունքներով Լեյբորիստական կուսակցությունն առաջին անգամ կորցրել է վերահսկողությունը Ուելսի խորհրդարանի նկատմամբ։ Անգլիայի տարբեր օրենսդիր մարմիններում լեյբորիստներն անցկացրել են 1,4 հազարով պակաս ներկայացուցիչ, քան նախկինում ունեին: Սթարմերն իր վրա է վերցրել ընտրություններում ձախողման պատասխանատվությունը, սակայն հրաժարվել է հեռանալ լեյբորիստների առաջնորդի և վարչապետի պաշտոններից։