Իրանը առանց Լիբանանում hրադադարի չի անցնի բանակցությունների հաջորդ փուլին. Բաղայի

Իրանը ԱՄՆ-ի հետ պատժամիջոցների և իրանական միջուկային ծրագրի հարցերով բանակցությունների նոր փուլ չի սկսի, քանի դեռ Լիբանանում հրադադար չի հաստատվել։ Այս մասին հայտարարել է Իրանի ԱԳՆ պաշտոնական ներկայացուցիչ Էսմայիլ Բաղային, հայտնում է ՏԱՍՍ-ը։

«Շվեյցարիայում այսօրվա հանդիպումը նվիրված է 2026 թվականի հունիսի 18-ի պատերազմի դադարեցման մասին փոխըմբռնման հուշագրի դրույթների կատարման վերահսկողությանը։ Համաձայն հուշագրի 13-րդ հոդվածի՝ վերջնական համաձայնագրի շուրջ բանակցությունների մեկնարկը կախված է 1-ին, 4-րդ, 5-րդ, 10-րդ և 11-րդ հոդվածների կատարումից։ Առանց այդ դրույթների կատարման, հատկապես 1-ին հոդվածի (բոլոր ճակատներում, ներառյալ Լիբանանում, պատերազմի դադարեցում), հնարավոր չէ անցնել վերջնական համաձայնագրի շուրջ բանակցությունների փուլին»,- գրել է Բաղային։

Նրա խոսքով՝ Շվեյցարիայում բանակցությունները կենտրոնացած կլինեն հուշագրի բոլոր կետերի կատարման վրա, ներառյալ իրանական նավթի արտահանումը և ակտիվների ապասառեցումը։

Ավելի վաղ Շվեյցարիայի ԱԳՆ-ն հաստատել էր ԱՄՆ-ի և Իրանի պատվիրակությունների, ինչպես նաև Կատարից ու Պակիստանից ժամանած միջնորդների ժամանումը բանակցությունների անցկացման վայր՝ շվեյցարական Բյուրգենշտոկ։ Ինչպես նշել է Բաղային, բանակցությունները կտևեն մեկ օր։