Պակիստանի պաշտպանության նախարարը պատերազմով է սպառնացել Հնդկաստանին

Պակիստանը կարող է պատերազմ հայտարարել Հնդկաստանին, եթե նրա ազգային ջրային անվտանգությունը սպառնալիքի տակ լինի Ինդոս գետի ջրամատակարարման համաձայնագիրը չպահպանելու պատճառով, հայտարարել է Պակիստանի պաշտպանության նախարար Խավաջա Մուհամմադ Ասիֆը։

«Հենց որ մենք ազգային անվտանգության սպառնալիքի առաջ կանգնենք, և ջրային ռեսուրսները դրա մի մասն են կազմում, մենք կպատերազմենք Հնդկաստանի հետ։ Անկասկած», - ARY News-ին տված հարցազրույցում ասել է Ասիֆը։

Իսլամաբադը կքննարկի ռազմական գործողությունների հարցը, եթե կան կոնկրետ ապացույցներ, որ Հնդկաստանը «շարժվում է տագնապալի արագությամբ՝ խաթարելով Պակիստանի ջրամատակարարումը՝ ջուրն օգտագործելով որպես զենք», - հավելել է պաշտպանության նախարարը։

Ավելի վաղ Հնդկաստանի ջրային ռեսուրսների նախարար Չանդրա Պրակաշ Պատիլը հայտարարել էր, որ Պակիստանը կարող է ամբողջությամբ կտրվել Ինդոս գետի ջրերից մինչև 2028 թվականի հունիսը, եթե չդադարի աջակցել միջսահմանային ահաբեկչությանը։

Պակիստանը բախվում է ջրի սուր պակասի՝ Հնդկաստանի կողմից երկկողմ Ինդոսի ջրային պայմանագրի կասեցման պատճառով, որը տեղի է ունեցել 2025 թվականի ապրիլին Ջամմու և Քաշմիրում Պահալգամի ահաբեկչական հարձակումից հետո, որի հետևանքով զոհվել է 26 մարդ։