Թրամփը պահանջում է կտրուկ ավելացնել հրթիռների արտադրությունը

ԱՄՆ նախագահ Դոնալդ Թրամփը չորեքշաբթի օրը Սպիտակ տանը հրավիրել է Պենտագոնի ղեկավարությանը և ամերիկյան խոշորագույն պաշտպանական ընկերություններին՝ քննարկելու հրթիռների և այլ զինամթերքի արտադրության արագ տեմպերով մեծացման հարցը։ Այս մասին հայտնում է The Wall Street Journal պարբերականը՝ հղում անելով աղբյուրներին։

Ըստ պարբերականի տվյալների՝ Թրամփը մտադիր է կոչ անել պաշտպանական արդյունաբերությանն ավելի արագ համալրել ամերիկյան սպառազինության պաշարները, որոնք կրճատվել են Իրանի հետ հակամարտության ֆոնին։ Ակնկալվում է, որ հանդիպմանը կմասնակցեն ԱՄՆ պաշտպանության նախարարի տեղակալ Սթիվեն Ֆայնբերգը, ինչպես նաև Lockheed Martin, RTX, Boeing, L3Harris, Northrop Grumman և Honeywell Aerospace ընկերությունների ներկայացուցիչները։

Ինչպես նշում է թերթը, Պենտագոնն ավելի վաղ արտադրողների հետ նախնական պայմանավորվածություններ է ձեռք բերել Patriot և Tomahawk հրթիռների արտադրության ծավալներն ավելացնելու շուրջ, սակայն այդ ծրագրերի լիարժեք ֆինանսավորումը դեռ հաստատված չէ Կոնգրեսի կողմից։ Ըստ WSJ-ի՝ 2027 ֆինանսական տարվա բյուջեի նախագծով ռազմական գերատեսչությունը պահանջել է 52,9 մլրդ դոլար՝ 12 տեսակի խիստ կարևոր զինամթերքի, այդ թվում՝ Patriot, Standard Missile և THAAD հրթիռների արտադրությունն ընդլայնելու նպատակով։