ՆԱՏՕ-ի գագաթնաժողովին ընդառաջ․ Անկարայում 13 օրով արգելվել են ցույցերն ու ԱԹՍ-ների թռիչքները

Անկարայի իշխանությունները հուլիսին կայանալիք ՆԱՏՕ-ի գագաթնաժողովին ընդառաջ անվտանգության և վերահսկողության լրացուցիչ միջոցառումներ են սահմանել։ Անկարայի նահանգապետարանի հաղորդմամբ՝ 13 օր շարունակ կարգելվեն ցանկացած տեսակի ակցիաներն ու անօդաչու թռչող սարքերի (ԱԹՍ) թռիչքները։

«2026 թվականի հուլիսի 7-8-ը Անկարայում կայանալիք ՆԱՏՕ-ի 36-րդ գագաթնաժողովի նախապատրաստական աշխատանքների շրջանակում ձեռնարկվել են անվտանգության անհրաժեշտ միջոցներ՝ ինչպես միջոցառման անվտանգությունն ապահովելու, այնպես էլ հասարակական կարգը պահպանելու նպատակով»,- նշել են իշխանությունները։

Սահմանափակումներն ուժի մեջ կլինեն հունիսի 28-ի ժամը 00:00-ից մինչև հուլիսի 10-ի ժամը 23:59-ը։ Այս ընթացքում նահանգի օդային տարածքում կարգելվի ցանկացած տեսակի ԱԹՍ-ի թռիչք, բացառություն կարվի միայն նահանգապետի հատուկ թույլտվությամբ: Նույն ժամանակահատվածում կարգելվում են նաև բոլոր տեսակի հավաքները, ցույցերը, մամուլի համար հայտարարությունները, հացադուլները, նստացույցերն ու բողոքի ակցիաները։ Արգելքը տարածվում է նաև տաղավարների ու վրանների տեղադրման, թռուցիկների և գրքույկների տարածման, ինչպես նաև պաստառների և բաններների փակցման վրա՝ թե՛ բաց, թե՛ փակ տարածքներում:

Բացի այդ, անվտանգության ուժերը հրահանգ են ստացել արգելել կողմնակի տրանսպորտային միջոցների և անձանց մուտքը հատուկ պահպանվող գոտիներ, այդ թվում՝ գագաթնաժողովի անցկացման և պատվիրակությունների տեղակայման վայրեր։ Նույն միջոցառումները կկիրառվեն նաև այն բոլոր ավտոճանապարհներին, որոնք առանձնացված են պատվիրակությունների և գագաթնաժողովի մասնակիցների պրոտոկոլային տեղաշարժի համար։