Ավստրալիայի բնակիչն «ամենաբարձր բղավոցի» համար հայտնվել է Գինեսի ռեկորդների գրքում

Փակե՛ք ականջները և ծանոթացե՛ք Ջոզեֆ ՄքԳրեյլ-Բեյթափի հետ՝ Կանբերրայի քաղաքային մունետիկի, որն «ամենաբարձր բղավոցի» համար դարձել է Գինեսի ռեկորդակիր․ գրում է Euronews-ը։

Քաղաքային մունետիկի պաշտոնը գործում է աշխարհի տարբեր երկրներում․ պաշտոնյան փողոցներում գոռալով հրապարակավ հայտարարում է լուրերը։ Սակայն կա՞ արդյոք ավելի հաճելի բան մի մարդու համար, որի գործը գոռալն է, քան աշխարհի ամենաբարձր ձայն ունեցողի տիտղոսը նվաճելը․ գրում է աղբյուրը։

Անցյալ շաբաթ Գինեսի ռեկորդների գիրքը հաստատել է, որ Կանբերրայի 58-ամյա բնակիչը գրանցել է երբևէ մարդու կողմից արձանագրված ամենաբարձր բղավոցը․ նա բղավել է «հիմա» (now) բառը՝ 122.4 դեցիբել ձայնի ուժգնությամբ։

Այսպիսով ավստրալացին գերազանցել է 1994 թվականին Հյուսիսային Իռլանդիայում բնակվող ուսուցչուհի Անալիսա Ֆլանագանի սահմանած 121.7 դեցիբելի նախորդ ռեկորդը։ Ֆլանագանն այն ժամանակ բղավել էր «լռություն» (quiet) բառը։