Գիտնականները բացահայտել են «հայրական կատակների» անսպասելի օգտակար ազդեցությունը

Ամերիկացի հոգեբաններ Փոլ Սիլվիան և Մերիել Բերնեթը պարզել են, որ հասարակ և երբեմն «անհաջող» թվացող հայրական կատակները կարող են դրական ազդեցություն ունենալ մարդու հոգեկան առողջության վրա։ Նրանց կարծիքով՝ նման հումորը նպաստում է տարբեր սերունդների միջև կապերի ամրապնդմանը։

Մասնագետների խոսքով՝ ծիծաղը նվազեցնում է սթրեսի հորմոնների՝ կորտիզոլի և ադրենալինի մակարդակը, միաժամանակ բարձրացնելով դոֆամինի, սերոտոնինի և էնդորֆինների արտադրությունը։ Հոգեբանները նշում են, որ հենց պարզ ու անմիջական կատակներն են ամենահաճախը ծիծաղ առաջացնում մարդկանց մոտ։

Երեխաների զարգացման մասնագետ Ժակլին Հարդինգը ևս համաձայնել է այս եզրակացությունների հետ՝ ընդգծելով, որ հումորը կարևոր դեր ունի երեխաների զարգացման, ծնողների և երեխաների միջև ամուր հուզական կապերի ձևավորման ու սթրեսի հաղթահարման գործում։ Նրա խոսքով՝ միասին ծիծաղելը առողջ հարաբերությունների կարևոր բաղադրիչներից է։