Ապօրինի պահվող զենք-զինամթերքի կամավոր հանձնման դեպքերը շարունակվում են. ոստիկանությունը ներկայացրել է արդյունքները (տեսանյութ)

Ոստիկանության կարևոր գործառույթներից է բնակչության մոտ ապօրինի պահվող զենք-զինամթերքի հայտնաբերումն ու առգրավումը։

Վերջին շրջանում Համայնքային ոստիկանության գլխավոր վարչության տարածքային ստորաբաժանումների բացատրական աշխատանքի արդյունքները ներկայացնենք մեկ տեսաշարով։

Համայնքային ոստիկանության Տավուշի բաժնի ծառայողների բացատրական աշխատանքի արդյունքում քաղաքացին կամավոր հանձնել է մեկ ինքնաձիգ, պայթուցիչներով երկու նռնակ, փամփուշտներ ու պահեստատուփ։

Կումայրիի համայնքային ոստիկանների բացատրական աշխատանքի արդյունքում մի քաղաքացի հանձնել է՝ ինքնաձիգ, կարաբին ու գազային ատրճանակ, նաև հակատանկային ական, նռնակ ու զինամթերք։ Նույն բաժնում մեկ այլ քաղաքացի կամավոր հանձնել է՝ հրացան, նռնակ, նռնակի երկու պայթուցիչ, հակատանկային ական, փամփուշտներ ու զինամթերք։

Մաշտոցի համայնքային բաժնում կամավոր հանձնել են՝ ինքնաձիգ, մարտական ատրճանակ, հրացան, պայթուցիչներով երկու նռնակ ու փամփուշտներ։

Համայնքային ոստիկանության Ճամբարակի բաժին ներկայացած քաղաքացին կամավոր հանձնել է ակոսափող հրացան։

Թալինի համայնքային բաժնում կամավոր հանձնել են հակատանկային նռնականետ, նռնակ ու պայթուցիչի մարտագլխիկներ։

Արդյունավետ էր նաև Չարենցավանի համայնքային ոստիկանների բացատրական աշխատանքը․ կամավոր հանձնել են ակոսափող հրազեն։

Հրազդանի բաժնում հանձնել են՝ հրազեն, թմբուկավոր ատրճանակ, նռնակ, նռնակի երեք պայթուցիչ, մեկ արկղ՝ 1080 հատ փամփուշտ և զինամթերք։

Ամասիայի համայնքային բաժնում կամավոր հանձնել են ատրճանակ, պայթուցիչով նռնակ ու փամփուշտներ։

Վարդենիսի համայնքային ոստիկանների բացատրական աշխատանքի արդյունքում էլ կամավոր հանձնել են՝ ինքնաձիգ, պայթուցիչով երկու նռնակ, բազմաթիվ փամփուշտներ ու զինամթերք։

Հիշեցնենք, որ ապօրինի պահվող զենք-զինամթերքը կամավոր հանձնողներն ազատվում են քրեական պատասխանատվությունից։