Էրդողանը Եվրոպայի երկրներին կոչ է արել ավելի մեծ պատասխանատվություն ստանձնել ՆԱՏՕ-ում

ՆԱՏՕ-ի անդամ եվրոպական երկրները պետք է ավելի մեծ պատասխանատվություն ստանձնեն դաշինքի շրջանակներում։ Այսպիսի կարծիք է հայտնել Թուրքիայի նախագահ Ռեջեփ Թայիփ Էրդողանը Հյուսիսատլանտյան դաշինքի գագաթնաժողովին ընդառաջ, որը կկայանա Անկարայում հուլիսի 7-8-ը։

«Դաշինքի եվրոպական հենասյան և զսպման նրա ներուժի ամրապնդումը մեր ընդհանուր առաջնահերթությունն է Անկարայում կայանալիք ՆԱՏՕ-ի գագաթնաժողովի շրջանակներում։ Մենք կարևորում ենք տրանսատլանտյան կապերի ամրապնդումը, և որպեսզի եվրոպացի դաշնակիցները ավելի մեծ պատասխանատվություն ստանձնեն [դաշինքի շրջանակներում]»,- ասել է Էրդողանը իր լեհ պաշտոնակից Կարոլ Նավրոցկիի հետ Անկարայում կայացած բանակցությունների արդյունքներով։ Հեռարձակումն իրականացրել է TRT Haber հեռուստաալիքը։

Ավելի վաղ հաղորդվում էր, որ Անկարայում կայանալիք ՆԱՏՕ-ի գագաթնաժողովին կմասնակցեն դրան անդամակցող 32 երկրների ղեկավարները, ինչպես նաև դաշինքի անդամ չհանդիսացող մի շարք պետությունների ղեկավարներ։ Ընդհանուր առմամբ ակնկալվում է մոտ 6 հազար մարդու մասնակցություն։

Բարձր մակարդակի հանդիպման անվտանգության ապահովման գործում կներգրավվի թուրքական ուժային կառույցների 70 հազար ծառայող։ Բարձր պատրաստվածության վիճակի կբերվեն Թուրքիայի ՀՕՊ համակարգերն ու ռազմաօդային ուժերը։ Ընդհանուր առմամբ Անկարայում կտեղակայվի անվտանգության բազմամակարդակ համակարգ՝ ԱԹՍ-ների և անօդաչուների դեմ պայքարի միջոցների կիրառմամբ։

Թուրքիան նախկինում ՆԱՏՕ-ի գագաթնաժողովը հյուրընկալել է Ստամբուլում 2004 թվականին։