ՑԱԽԱԼ-ը հայտարարել է Լիբանանի հարավի բուֆերային գոտում «Հըզբոլլահի» զինյալների ուղղությամբ կրակ բացելու մասին

Իսրայելական զինվորականները կրակ են բացել շիայական «Հըզբոլլահ» շարժման չորս արմատականների ուղղությամբ, որոնք բուլդոզերով և մոտոցիկլետներով տեղաշարժվում էին Լիբանանի հարավում գտնվող բուֆերային գոտու տարածքում։ Այս մասին հայտնել է Իսրայելի պաշտպանության բանակի (ՑԱԽԱԼ) մամուլի ծառայությունը։

«Անվտանգության գոտու սահմաններում՝ Ալի էթ Թահիր լեռնաշղթայի շրջանում, զինվորները հայտնաբերել են «Հըզբոլլահի» չորս ահաբեկիչների, որոնք տեղաշարժվել են բուլդոզերով և մոտոցիկլետներով, մտել բուֆերային գոտի և մոտեցել զինվորներին՝ անմիջական սպառնալիք ներկայացնելով։ Զինվորները նախազգուշական կրակ են բացել։ Այն բանից հետո, երբ ահաբեկիչները շարունակել են մոտենալ և չեն ենթարկվել զինվորների պահանջներին, սպառնալիքը վերացնելու նպատակով կրակ է բացվել։ Արձանագրվել են խոցումներ»,- ասվում է հայտարարության մեջ։

Ավելի վաղ ՑԱԽԱԼ-ից հայտնել էին, որ նոր հարված են հասցրել «Հըզբոլլահի» զինված ջոկատին Հարավային Լիբանանի տարածքում։

Իրանի ներկայացուցիչներն ավելի վաղ ԱՄՆ-ի հետ բանակցություններում պահանջել էին ամբողջական զինադադար հաստատել Լիբանանում և այնտեղից դուրս բերել իսրայելական զորքերը՝ զգուշացնելով, որ հակառակ դեպքում Թեհրանը կրկին կփակի Հորմուզի նեղուցը։ Իսրայելի իշխանություններն իրենց հերթին հայտարարել են, որ բանակը դուրս չեն բերի Լիբանանից այնքան ժամանակ, քանի դեռ հրեական պետությունը վտանգ է տեսնում իր հյուսիսային շրջանների համար «Հըզբոլլահի» ջոկատների կողմից, իսկ իսրայելական զորքերը շարունակում են պահպանել Հարավային Լիբանանում զբաղեցրած դիրքերը և այնտեղ ունեն «գործողությունների լիակատար ազատություն»՝ «առաջացող սպառնալիքները վերացնելու» համար։