ԱՄՆ բանակն Ուկրաինայում մարտական գործողությունները նմանակող զորավարժարաններ կստեղծի

ԱՄՆ ցամաքային զորքերը ծրագրում են ստեղծել երկու հատուկ զորավարժարան, որտեղ կվերստեղծվեն Ուկրաինայում մարտական գործողությունների պայմանները՝ անօդաչու թռչող սարքերի ակտիվ կիրառմամբ։ Այս մասին լրագրողներին հայտնել է ԱՄՆ ցամաքային զորքերի նախարար Դենիել Դրիսկոլը։

​«Կարելի է մոդելավորել էլեկտրոնային պատերազմի պայմանները և մարտական գործողությունների ողջ իրադրությունը, ինչպես նաև կազմակերպել անօդաչուներ արտադրողների և դրոնների դեմ պայքարի միջոցներ մշակողների համատեղ աշխատանքը»,- նրա խոսքերն է մեջբերում CBS News հեռուստաալիքը։ Նա նաև նշել է, որ զինծառայողները կկարողանան այնտեղ հարմարվել մարտական գործողությունների ժամանակակից պայմաններին և անմիջականորեն փոխգործակցել սպառազինություն մշակողների հետ։

​Դրիսկոլը նշել է, որ ներկայումս ցամաքային զորքերը նաև համապատասխան վայր են փնտրում արտերկրում նմանատիպ զորավարժարան ստեղծելու և «շատ ավելի ագրեսիվ պատրաստություն» անցկացնելու համար։ Ինչպես նշում է CBS News-ը, դա կարող է կապված լինել ռադիոէլեկտրոնային ճնշման պայմաններ ստեղծելու անհրաժեշտության հետ, քանի որ նման տեխնոլոգիաների կիրառումն ԱՄՆ տարածքում սահմանափակ է։