Պատահականությու՞ն, թե՞ պլանավորված քաղաքականություն՝ Փաշինյանի կողմից․ կիսատ-պռատ քարտեզը՝ քաղաքային ավտոբուսում

Նախընտրական քարոզարշավն ավարտվել է, սակայն Նիկոլ Փաշինյանի կողմից խորհրդանշական դարձած Հայաստանի կիսատ-պռատ քարտեզը շարունակում է շրջել մայրաքաղաքում, ու կրճատ Հայաստանի գաղափարը քարոզվում է անգամ հանրային տրանսպորտում։ Հունիսի 19-ին միջադեպ է արձանագրվել Երևանի թիվ 54 ավտոբուսային երթուղում։

Ավտոբուսի սրահում՝ խիստ տեսանելի վայրում՝ անմիջապես վարորդի կողքին, դրված է եղել Հայաստանի այն քարտեզը, որն ընտրարշավի ընթացքում ակտիվորեն օգտագործում էր Նիկոլ Փաշինյանը՝ երբեմն կրելով կրծքին, երբեմն գլխարկի վրա, երբեմն էլ ձեռքին՝ երկրի տարբեր բնակավայրերում անցկացվող հանդիպումների ժամանակ։ Տեղում զրուցեցինք վարորդի հետ՝ փորձելով պարզել, թե ինչու է այդ քարտեզը հայտնվել ավտոբուսում, արդյոք այն արտահայտում է իր դիրքորոշումը։ Վարորդը պատասխանեց, որ տվյալ ավտոբուսը չի հանդիսանում իր մշտական տրանսպորտային միջոցը և ինքը առաջին անգամ է նստել դրա ղեկին։ «Սա թիվ 53 երթուղու ավտոբուսն է եղել։ Իմ մշտական ավտոբուսը տեխնիկական խնդիր ունի, անսարք է, ես ժամանակավորապես աշխատում եմ սրանով։

Երբ առավոտյան վերցրի մեքենան, քարտեզն արդեն այստեղ էր։ Քանի որ ավտոբուսն իմը չէ, այդ իրերն էլ ինձ չեն պատկանում, չեմ հեռացրել»,- ասաց նա։ Վարորդը նաև վստահեցրեց, որ նախընտրական քարոզարշավի ընթացքում քաղաքային իշխանությունների կողմից որևէ ճնշում չի եղել։ Նրա խոսքով՝ եղել են միայն դեպքեր, երբ տարբեր քաղաքական ուժերի ներկայացուցիչներ բարձրացել են ավտոբուս և ուղևորներին քարոզչական թռուցիկներ են բաժանել։ «Բուկլետներ են բաժանել, բայց որևէ միջադեպ չի եղել։ Մարդիկ կա՛մ հրաժարվել են վերցնել, կա՛մ վերցրել ու պահել են իրենց մոտ»,- նշեց նա։ Դեպքի վերաբերյալ մեկնաբանություն ստացանք նաև «Երևանի ավտոբուս» ՓԲԸ մամուլի խոսնակ Գեղամ Ասատրյանից։ Վերջինս նշեց․

«Նախ և առաջ նկատենք, որ նախընտրական շրջանը վաղուց անցել է, հետևաբար այստեղ որևէ քաղաքական ուղղորդում չկա, եթե, իհարկե, ՀՀ-ի քարտեզը քաղաքականը ուղղորդում է։ Օրական կտրվածքով 700-ից ավելի ավտոբուս է շահագործվում, եթե քաղաքական որևէ ենթատեքստ կամ ուղղորդում լիներ, վստահաբար դժվար չէր լինի այնպես անել, որ բոլոր ավտոբուսներում լինեին, հետևաբար անհարկի է այս հարցին անդրադառնալն»,- ընդգծեց Ասատրյանը։ Այս ամենի համատեքստում, սակայն, հարցը միայն մեկ քարտեզի կամ մեկ ավտոբուսի մասին չէ։

Եթե քարոզարշավն ավարտվել է, ապա ինչո՞ւ է Փաշինյանի խորհրդանիշը շարունակում մնալ հանրային տարածքում՝ քաղաքացիների աչքի առաջ։

Արդյո՞ք սա պարզապես անուշադրության հետևանք է, թե հերթական փորձ՝ հասարակությանն աստիճանաբար հաշտեցնելու այն իրականության հետ, որ Արցախի հարցը փակված էջ է (ինչպես իրենք են նշում), իսկ Հայաստանի իշխանությունները վերջնականապես հրաժարվել են արցախյան հակամարտության օրակարգից։