Berliner Zeitung․ Ֆոն դեր Լայենի դեմ ստուգում են սկսել՝ Զելենսկու հետ նամակագրության պատճառով

Եվրոպական օմբուդսմեն Թերեզա Անժինյոն ստուգում է սկսել Եվրահանձնաժողովի (ԵՀ) նախագահ Ուրսուլա ֆոն դեր Լայենի նկատմամբ՝ Գերմանիայի կանցլեր Ֆրիդրիխ Մերցի, Ֆրանսիայի նախագահ Էմանուել Մակրոնի, Իտալիայի վարչապետ Ջորջա Մելոնիի, Բրիտանիայի վարչապետ Քիր Սթարմերի և Վլադիմիր Զելենսկու մասնակցությամբ գաղտնի չաթի պատճառով: Այս մասին գրում է Berliner Zeitung թերթը։

Անժինյոն ստուգման մասին Եվրահանձնաժողովին ծանուցել է անցյալ շաբաթ։ Նա ուսումնասիրում է, թե արդյոք ԵՀ-ն չի խախտել թափանցիկության կանոնները՝ հրաժարվելով նամակագրության հասանելիություն տրամադրել հոլանդական Follow the Money (FTM) կազմակերպությանը: Եվրահանձնաժողովում մերժումը հիմնավորել են նրանով, որ չաթի տվյալների հրապարակումը կարող է «բարդացնել Եվրամիության (և նրա անդամ երկրների) միջազգային հարաբերությունները երրորդ պետությունների հետ»։

«Ես որոշում եմ կայացրել հետաքննություն սկսել դիմումատուի պահանջի նկատմամբ Եվրահանձնաժողովի գործողությունների շուրջ՝ փաստաթղթերի հանրային հասանելիությանը վերաբերող ԵՄ նորմատիվ ակտերին համապատասխան»,- գրել է Անժինյոն FTM կազմակերպությանը։ Նա ակնկալում է մինչև հուլիսի կեսերը հանդիպել ԵՀ ներկայացուցիչների հետ։