Առաջարկել են «Կորվալոլը» վաճառել միայն դեղատոմսով

Ռուս հոգեբույժ և հոգեթերապևտ Յուրի Վյալբան առաջարկել է «Կորվալոլ» դեղամիջոցը դարձնել դեղատոմսով տրամադրվող պատրաստուկ։ «Говорит Москва» ռադիոկայանի եթերում նա նշել է, որ դեղամիջոցի բաղադրության մեջ առկա ֆենոբարբիտալը կարող է ազդել գիտակցության վրա և մեծ չափաբաժիններով վտանգավոր լինել առողջության համար։

Բժշկի խոսքով՝ ֆենոբարբիտալը Ռուսաստանում ինքնին համարվում է դեղատոմսով վաճառվող նյութ, ուստի տրամաբանական կլինի նույն կարգավորումը կիրառել նաև «Կորվալոլի» նկատմամբ։ Նա ընդգծել է, որ փոքր չափաբաժիններով դեղամիջոցը սովորաբար վտանգ չի ներկայացնում, սակայն չարաշահման դեպքում կարող է առաջացնել լուրջ հետևանքներ։

Վյալբան նաև նշել է, որ «Կորվալոլը» երբեմն օգտագործվում է կախվածություն ունեցող անձանց կողմից մեծ քանակությամբ՝ գիտակցության վրա ազդեցություն ստանալու նպատակով։ Նրա գնահատմամբ՝ հատկապես վտանգված են դեռահասները, որոնց օրգանիզմի վրա նման նյութերի ազդեցությունը կարող է ավելի ծանր լինել։ Ավելի վաղ ռուսական լրատվամիջոցները հայտնել էին, որ դպրոցականների շրջանում տարածում է գտել «Կորվալոլ» պարունակող վտանգավոր խառնուրդների օգտագործումը։