Մակրոնը հայտնել է Ֆրանսիայի ռազմածովային ուժերի կողմից նավթատար նավի կալանավորման մասին

Ֆրանսիայի նախագահ Էմանուել Մակրոնը հայտարարել է, որ երկրի ռազմածովային ուժերը Սիցիլիայի ափերի մոտ կալանել են Deliver անունով նավթատար նավը՝ ենթադրյալ ծովային իրավունքի խախտման պատճառով։ Նրա հայտարարությունը հրապարակվել է սոցիալական X հարթակում։

Մակրոնի խոսքով՝ սա հերթական գործողությունն է այսպես կոչված «ստվերային նավատորմի» դեմ, որը, ըստ եվրոպական կողմի, փորձում է շրջանցել պատժամիջոցները։ Նա նշել է, որ նման գործողությունները ցույց են տալիս Եվրոպայի վճռականությունը՝ կանխելու այն, որ այդ նավատորմը ֆինանսավորի ռազմական գործողությունները Ուկրաինայում։

Ֆրանսիայի նախագահի հայտարարության մեջ ընդգծվում է, որ Եվրոպան կշարունակի քայլեր ձեռնարկել՝ հակամարտության ծախսերը բարձրացնելու և երկարաժամկետ խաղաղության հասնելու նպատակով։ Ավելի վաղ նաև Մեծ Բրիտանիայի իշխանությունները հայտնել էին նմանատիպ գործողության մասին՝ նշելով, որ Լա Մանշի նեղուցում կալանել են «Սմիրթոս» անունով նավթատար նավ։