Ճապոնիայում գրանցվել է 7,2 մագնիտուդով երկրաշարժ

Ճապոնիայում տեղի է ունեցել ուժեղ երկրաշարժ՝ 7,2 մագնիտուդով, որի էպիկենտրոնը գտնվել է Խաղաղ օվկիանոսում՝ Իվատե պրեֆեկտուրայի Կուձի քաղաքից մոտ 30 կիլոմետր արևելք։ Ցնցումների օջախը գրանցվել է մոտ 50 կիլոմետր խորության վրա, հայտնում են Ճապոնիայի օդերևութաբանական ծառայությունները։

Սեյսմիկ ցնցումները զգացվել են երկրի հյուսիս-արևելքում, մասնավորապես Իվատե և Աոմորի պրեֆեկտուրաներում, ինչպես նաև թույլ կերպով՝ Տոկիոյում։ Տեղական իշխանությունների տվյալներով՝ որոշ շրջաններում գրանցվել են 5-ից բարձր ինտենսիվության ցնցումներ, ինչի հետևանքով ժամանակավորապես դադարեցվել է երկաթուղային երթևեկությունը։

Japan Times-ի տվյալներով՝ երկրաշարժի հետևանքով վիրավորվել է առնվազն 10 մարդ։ Փրկարարական ծառայությունները շարունակում են հետևել իրավիճակին, իսկ սեյսմոլոգները չեն բացառում հետցնցումների հնարավորությունը։